ԵՐԵՎԱՆ, 11 դեկտեմբերի- Sputnik. Ամերիկյան և թուրքական հատուկ ծառայությունները նախազգուշացնում են, որ Թուրքիայում կարող են ահաբեկչություններ իրականացվել։ Այս մասին գրում է Hurriyet թերթը։
Թուրքիայի Կենտրոնական հետախուզական վարչության (ԿՀՎ) և Ազգային հետախուզական կազմակերպության տեղեկատվության համաձայն, «Իսլամական պետություն» ահաբեկչական խմբավորման գրոհայինները պատրաստվում են ահաբեկչական գործողություններ իրականացնել Թուրքիայում տեղակայված ամերիկյան օբյեկտների դեմ (օրինակ` հյուպատոսությունների, դեսպանատների և ռազմակայանների)։
Ենթադրվում է, որ ԻՊ գրոհայինները ծրագրել են նաև ահաբեկչական գործողություններ իրականացնել երկրի զբոսաշրջային վայրերում։
Ինչպես հայտնում է թերթը, դեկտեմբերի 2-ին և 5-ին թուրքական իշխանությունը երկու առանձին նախազգուշացում էր հրապարակել և ահաբեկչություն ծրագրող հինգ գրոհայինի անուն էր նշել։ ԱՄՆ-ի և Թուրքիայի հետախուզությունները պարզել են, որ Թուրքիայի տարածք թափանցած երեք պաղեստինցիները կարող էին ահաբեկչական հարձակումներ կատարել։ Դրանից հետո Թուրքիայի ոստիկանության բաժանմունքը գրավոր նախազգուշացում է ուղարկել երկրի նահանգների ոստիկանության բոլոր ստորաբաժանումներ։
ԻՊ-ն, որն այսօրվա դրությամբ համաշխարհային անվտանգության գլխավոր սպառնալիքներից է, երեք տարում զավթել է Իրաքի և Սիրիայի տարածքի զգալի մասը։ Բացի այդ, խմբավորումը փորձում է իր ազդեցությունը տարածել Հյուսիսային Աֆրիկայի երկրներում։
