ԵՐԵՎԱՆ, 25 մարտի – Sputnik. Էկոնոմիկայի նախարարությունը պետք է քաղաքականություն մշակի և կոնկրետ լուծումներ առաջադրի բոլոր այն պետական մարմինների համար, որոնց գործունեության ոլորտում կան շուկայում գերիշխող կամ մենաշնորհային դիրք ունեցող ձեռնարկություններ: Այս մասին այսօր լրագրողների հետ զրույցում ասաց էկոնոմիկայի նախարար Արծվիկ Մինասյանը՝ ավելացնելով, որ այդ աշխատանքն առաջինը հենց իր ղեկավարած նախարարությունից է սկսել:
«Մենք պետք է պրակտիկայում ցույց տանք, որ հակամենաշնորհային քաղաքականությունը նաև մենք ենք իրականացնում և մրցակցայի վիճակի վատթարացումը կախված է նաև մեզանից»,- ասաց նախարարը:
Ի դեպ, քաղաքականության մշակումից հետո, արդեն դրա գործադրման փուլում, Արծվիկ Մինասյանը չի բացառում, որ լինելու են տնտեսվարողներ, ովքեր կփորձեն հակազդեցություն կիրառել: Հակառակ դեպքում, նրա խոսքով, մենաշնորհի դեմ պայքարի անհրաժեշտություն չէր առաջանա:
Իսկ մենաշնորհների դեմ պայքարն ու շուկայի վերահսկողության իրականացումը էկոնոմիկայի նախարարությունը սկսելու է նախ անորակ բենզինի, գազի, գազի սարքավորումների, խաղալիքների շրջանառության նկատմամբ վերահսկողություն սահմանելուց: Այնպես որ սկսված գործընթացի առաջին արդյունքը, որ կնկատեն սպառողները, Արծվիկ Մինասյանի խոսքով, հենց այս ոլորտներում է լինելու: Դրա համար նախ անհրաժեշտ է, որ էկոնոմիկայի նախարարության տեսչությունը վերակազմավորվի ու սկսի գործել, քանի որ այն արդեն 8 ամիս է, ինչ չի իրականացնում իր գործառույթները:
Հաջորդ երկու ոլորտները, որտեղ մոտ ապագայում ՀՀ քաղաքացիներին Արծվիկ Մինասյանը դրական տեղաշարժեր է խոստանում, օդային փոխադրումների և տուրիզմի ոլորտներն են: Նախարարի խոսքով` իրենք այս պահին ջանքեր են գործադրում հնարավորինս մեծ և որակյալ ավիափոխադրողի մուտքը Հայաստան ապահովելու համար:
