ԵՐԵՎԱՆ, 13 հունիսի — Sputnik. Ազգային հերոս Գարեգին Նժդեհին հակառուս համարելը պարզապես ծիծաղելի է, կարծում է ՀՀ ԱԺ փոխնախագահ Էդուարդ Շարմազանովը։
Ավելի վաղ ՌԴ ԱԳՆ-ի պաշտոնական ներկայացուցիչ Մարիա Զախարովան հայտարարել էր, որ Մոսկվային զարմացրել է Վերմախտի «Հայկական լեգեոնի» հիմնադիրներից մեկի` գեներալ Գարեգին Նժդեհի արձանը Երևանում տեղադրելու փաստը։
«Նժդեհը երբեք հակառուս չի եղել: Բոլոր նրանք, ովքեր ցանկանում են Նժդեհին ներկայացնել հակառուսական, գործիչ, չարաչար սխալվում են: Նժդեհը շատ լավ հարաբերություններ է ունեցել ռուսական մտավորականության ներկայացուցիչների հետ: Նա մեկ տարի ուսանել է Պետերբուրգի համալսարանի իրավաբանական ֆակուլտետում, առաջին աշխարհամարտի տարիներին ցարական ռուսական բանակի մեջ մտնող հայկական կամավորական երկրորդ գնդի փոխհրամանատարն էր: Նա 1916թ. ցարական հրամանատարության կողմից արժանացել է Գեորգիևյան խաչի»,- ասաց Շարմազանովը։
Նրա խոսքով` Գարեգին Նժդեհի 1946-1948թթ.-ի գրառումների, նամակների մեջ «Ինչու ստեղծվեց ցեղակրոն շարժումը» հոդված կա, որում նա ասում է. «Հայ ժողովրդի և ցեղակրոնի միակ դաշնակիցը մեծ ռուս ժողովուրդն է»:
«Այս պարագայում փորձել Նժդեհին ներկայացնել որպես հակառուսական գործիչ, ծիծաղելի է: Նժդեհը Հայաստանի հերոս է և իր ողջ կյանքը նվիրել է Հայաստանի հզորությանը, ազատագրմանն ու անկախությանը»,- ասաց Շարմազանովը:
Նշենք, որ Երևանում հայ ազգային հերոս Գարեգին Նժդեհի արձանի բացումը տեղի է ունեցել մայիսի 28-ին։
