ԵՐԵՎԱՆ, 29 հունիսի — Sputnik. Սաթենիկ Աչիկյանն իր գործարար գործունեությունը սկսել է 2011թ-ից, ինչպես ինքն է ասում` 2 գաթայից։ Տիկին Սաթենիկի` տնային պայմաններում թխած գաթաներն արժանացել էին երևանյան խոշոր առևտրային ցանցերից մեկի հավանությանն ու վաճառքի հանվել խանութներից մեկում։ Գործարար աշխարհի իր մոտքը ներկայացնելով` տիկին Սաթենիկը կատակեց. «Մայրս դարձավ իմ գործընկերը, ամուսինս` իմ բանկը»։
Մոր բաղադրատոմսով ու ամուսնու հատկացրած նախնական գումարով տան խոհանոցում թխված գաթաներն այսօր երևանցիներից շատերն են հասցրել սիրել։
«Եթե սկսել եմ իմ սեփական խոհանոցում երկու գաթա թխելով, այսօր արդեն ունենք 8 աշխատակցով արտադրամաս»,- ասաց տիկին Սաթենիկը` նշելով, որ այժմ արդեն օրական 400 գաթա է արտադրվում։
Հայաստանի կին գործարարները 5 տարի շարունակ իրենց գործնական հաջողություններից զատ արժանանում են նաև վարչապետի ուշադրությանը։ «Լավագույն կին» գործարար մրցանակաբաշխությունն անցկացվում է 2012 թ-ից։
Այս տարի մրցանակի է արժանացել 142 կին գործարար, որոնցից 38-ը՝ Երևանից, 102-ը՝ ՀՀ մարզերից, 2-ը` Արցախից։
Ստեփանակերտի հարսանյաց սրահի սեփականատեր Ռեգինա Գալոյանը մեզ հետ զրույցում պատմեց, որ փոքրիկ սրահում նորապսակների հարսանեկան արարողության համար անհրաժեշտ բոլոր խնդիրները հոգալուց զատ նաև փոքրիկ խանութ ունեն, որտեղ նորապսակների ապագա երեխաների համար նախատեսված հագուստ են վաճառում։
«Այնպես որ աշխատում ենք Արցախի ապագայի համար»,- ասաց մեր զրուցակիցը։
Ինչ վերաբերում է արցախյան հարսանիքի առանձնահատկություններին, Ռեգինա Գալոյանը նշեց, որ որոշ տեղական ավանդույթներ, անշուշտ, կան, և իրենք փորձում են պահպանել բոլոր ազգային ավանդույթները։
Բացի վարչապետի մրցանակներից, այս տարվա մրցանակաբաշխության համար առաջին անգամ մրցանակներ են սահմանել նաև ՀՀ էկոնոմիկայի նախարարությունն ու Հայաստանի Փոքր և միջին ձեռնարկատիրության զարգացման ազգային կենտրոնը:
