ԵՐԵՎԱՆ, 5 հուլիսի — Sputnik. «Վարչական իրավախախտումների վերաբերյալ» ՀՀ օրենսգրքի փոփոխություններով հիմք դրվեց « նվազ նշանակության իրավախախտումների» դրույթի կիրառմանը։ Որոշ խախտումների դեպքում վարորդներին հնարավորություն է տրվում 24 ժամում վերացնել խնդիրը և խուսափել տույժ-տուգանքներից։ Օրինակ, պակաս լուսաթափանցելիություն ունեցող մեքենայի դիմապակի տեսնելով` ճանապարհային ոստիկանը կարող է կանգնեցնել մեքենան ու վարորդից պահանջել թաղանթը պատռել։ Իսկ եթե քաղաքացին 24 ժամվա ընթացքում է վերացնում իրավախախտումը, ապա արձանագրային որոշումից հետո էլ կարող է խուսափել վարչական տույժից։
«Պատռելու պրոցեսը տեղի է ունենում վարորդի համաձայնությամբ»,-հստակեցրեց Արման Չիլինգարյանը։
Էդուարդ Հովհաննիսյանը հակադարձեց` ինչպես կարող է ճանապարհային ոստիկանը հասկանալ` ապակին մգացվա՞ծ է, թե՞ թաղանթապատ։ Չիլինգարյանի` «Մարդիկ աշխատանքային փորձ ունեն, հասկանում են» պատասխանը նրան չգոհացրեց։ Հետևեց հաջորդ հարցը.
— Նորից եմ հարցնում` ունե՞նք օրենք, որով պետք է ստուգվի` թաղանթապատվա՞ծ է, թե՞ ոչ։
Կրկնակի հարցին անգամ Չիլինգարյանը խուսափող պատասխան տվեց ու չգոհացրեց Հովհաննիսյանին։
Sputnik Արմենիայի հարցմանն ի պատասխան, թե որոնք են մեքենաների ապակիները թաղանթապատելու նորմատիվները, ՃՈ իրավաբանական բաժնի պետը նախ ասաց, որ ոչ մի գործարան մգացված ապակիներով մեքենաներ չի թողարկում։ Այլ բան է թաղանթապատումը։
«Առջևի դիմապակին պետք է ունենա 70-տոկոսանոց լուսաթափանցելիություն, բայց թաղանթ չի կարող ունենալ։ Եթե տրանսպորտային միջոցն ունի կողային հայելիներ, ապա առջևի ու հետևի դռների ապակիները պետք է ունենան 70-տոկոսանոց լուսաթափանցելիություն։ Այդ դեպքում թուլատրվում է վարորդի նստելատեղից հետ գտնվող հատվածը անսահմանափակ մգացնել»,-ասաց նա։
Սակայն ոչ բոլոր կանոններն են վերաբերում նվազ նշանակություն ունեցող դեպքերին։ Չիլինգարյանը հայտնեց, որ պատասխանատվության կենթարկվի նա, որի մեքենայի անիվները ամբողջությամբ կհատեն լուսացույցի առջև գտնվող հոծ գիծը։
«Եթե մեկը տուգանվել է դրա համար, նշանակում է, որ չի ցանկացել պահպանել կանոնները կամ ուշադիր չի եղել երթևեկության նկատմամբ, որը չի կարող համարվել «նվազ նշանակություն ունեցող»։ Նախազգուշացման դրույթ կա նաև խաչմերուկներին մոտենալու ժամանակ երթևեկության գոտիները բաժանող հոծ գծանշումների խախտման դեպքում։ Այստեղ օրենքը չի սահմանում պատասխանատվություն, եթե այդ գծանշումը հատվել է մեկ անիվով։ Մեկ ամիս ասելով` նկատի ունեմ մեկ կողմի անիվները»,-պարզաբանեց Չիլինգարյանը։
Չնայած Արման Չիլինգարյանի և Էդուարդ Հովհաննիսյանի բանավեճին, վերջինս, այնուամենայնիվ, խոստովանեց, որ նվազ նշանակության իրավախախտումների դրույթները գործում են, և առաջադիմություն կա։
