ԵՐԵՎԱՆ, 6 սեպտեմբերի — Sputnik. Հայ զինվորականները սովորում են Ռուսաստանում զինվորական կադրերի անվճար նախապատրաստման մասին համաձայնագրի շրջանակում, լրագրողներին ասաց ՀԱՊԿ գլխավոր քարտուղար Նիկոլայ Բորդյուժան։
«Ռուսաստանում հայ զինծառայողները սովորում են ՀԱՊԿ անդամ երկրների համար անվճար կամ արտոնյալ պայմաններով զինվորական կադրեր պատրաստելու մասին համաձայնագրին համապատասխան։ Այդ համաձայնագրի համաձայն` քվոտաներ են հատկացվել բոլոր պետություններին ոչ միայն ռազմական-ուսումնական հաստատությունների, այլև իրավապահ մարմինների, ԱԻՆ-ի և այլ ուժային կառույցների ուսումնական հաստատությունների համար»,- ասաց Բորդյուժան։
Նրա խոսքով` Ռուսաստանը հայ զինծառայողներին այնքան կուսուցանի, որքան կպահանջվի։ «Երևանի համար կադրերի նախապատրաստման ավելացումը պահանջների իրագործումն է, որոնք այսօր դրված են Հայաստանի բանակի առջև, մասնավորապես, հրամանատարական պաշտոնների փոխարինման հարցում»,- հավելեց Բորդյուժան։
Պատասխանելով այն հարցին, որ Հայաստանի խաղաղապահ ջոկատները տարբեր գործողություններում մասնակցում են ՆԱՏՕ-ի երկրների հրամանատարությամբ, ՀԱՊԿ քարտուղարը պատասխանեց, որ կազմակերպությունը դրական է գնահատում նմանատիպ երևույթները։ «Մենք միանգամայն հանգիստ ենք վերաբերվում մեր երկրների փոխգործակցությանը այլ միջազգային կառույցների հետ, այդ թվում` ՆԱՏՕ-ի։ Այստեղ սարսափելի ոչինչ չկա։ Մենք դրական ենք գնահատում, եթե պետությունը պայմանավորվում է ՀԱՊԿ միջոցառումներից զատ այլ միջոցառումների մասնակցելու համար»,- ասաց Բորդյուժան։
Նրա խոսքով` գլխավորն այն է, որպեսզի այդ համագործակցությունը չվնասի ՀԱՊԿ շրջանակում դաշնակցային պարտավորություններին։
