ԵՐԵՎԱՆ, 9 սեպտեմբերի — Sputnik. Հանրային խորհուրդը որոշում է կայացրել դիմել ՀՀ վարչապետի պաշտոնում առաջադրված Կարեն Կարապետյանին՝ մինչև նշանակվելը փակ աշխատանքային հանդիպում ունենալ ՀԽ անդամների հետ ու լսել նրանց առաջարկությունները: Sputnik Արմենիային տեղեկացրեց ՀԽ նախագահ Վազգեն Մանուկյանը:
Ինքն անձամբ, որպես ՀՀ առաջին վարչապետ, պատրաստ է իր փորձն ու գիտելիքները փոխանցել 14-րդ վարչապետին, քանի որ, իր խոսքով, ժամանակին ինքն էլ է զգացել իր նախորդների փորձառության ու խորհուրդների կարիքը:
«Երբ ես վարչապետ դարձա, իմ ամենամոտ խորհրդականը, որին միշտ հրավիրում ու խոսում էի հետը, Ֆադեյ Տաճատիչն էր, որը 12 տարի վարչապետ էր եղել: Մարգարյանցի հետ ես մեծ զրույց ունեցա ոչ միայն այն ժամանակ, երբ վարչապետ դարձա, այլև հետո, երբ նա Մոսկվա գնաց, ես հեռախոսով անընդհատ նրա հետ խորհրդակցում էի»,- ասա Վազգեն Մանուկյանը:
Նախկին վարչապետի համոզմամբ, նորերը միշտ կարիք ունեն նախորդների փորձի ու խորհրդի:
«Շատ անգամ թոհուբոհի մեջ շատ բան չես հասկանում, բայց երբ դրանից դուրս ես գալիս ու հետադարձ հայացք ես գցում, տեսնում ես, որ շատ բան կարելի էր այլ կերպ անել, և դա օգտակար է նոր վարչապետներին»,-խոստովանում է Մանուկյանը:
Ի դեպ, Վազգեն Մանուկյանն արդեն նույնիսկ հստակ պատկերացնում է, թե ինչ խորհուրդ է տալու նորանշանակ վարչապետին:
«Առաջինը՝ ամեն ինչ ապահովել, որ Հայաստանում լինի արդար, ազատ մրցակցություն և ոչ թե իշխանություն կամ զոռբայություն ունեցողները կարողանան բիզնեսով զբաղվել, և երկրորդը՝ կան արդյունաբերության ճյուղեր, որոնց գործարկման դեպքում հույսը մասնավորի վրա դնելը սխալ է, պետությունը պետք է որոշ ճյուղեր վերցնի իր օժանդակության ներքո»,-հեռակա կերպով Կարեն
Կարապետյանին ներկայացնելով իր հիմնական տնտեսական առաջարկները, ասաց նախկին վարչապետը:
Բացի այդ, Վազգեն Մանուկյանը նոր կառավարությանն առաջարկում է նաև գյուղատնտեսության ոլորտում գնալ գյուղացիական տնտեսությունների խոշորացման և պետական դոտացիաներով աջակցելու ճանապարհով:
