ԵՐԵՎԱՆ, 12 սեպտեմբերի — Sputnik. Ինչպես ՀԱՊԿ-ի, այնպես էլ ՆԱՏՕ-ի և այլ միջազգային կառույցների համագործակցությունը շարունակում է մնալ Հարավային Կովկասի անվտանգ և կայուն զարգացման հիմնական նախադրյալներից մեկը, նշեց ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը «Առաջիկա մարտահրավերները. ՆԱՏՕ-ն Ուելսից մինչև Վարշավա և անդին» կոնֆերանսի ժամանակ։
«Հայաստանն իր անվտանգ միջավայրի կայունության պահպանման համար որդեգրել է բազմավեկտոր քաղաքականության ձևաչափը։ ՆԱՏՕ-ի հետ հարաբերություններում մեր գործողությունները մշտապես պայմանավորված են եղել ՆԱՏՕ-ի հետ քաղաքական երկխոսությամբ ու գործնական փոխգործակցությամբ։ 2004 թվականից Հայաստանի խաղաղապահ ստորաբաժանումները մասնակցում են խաղաղության հաստատման գործողություններին»,-ասաց Զաքարյանը։
ՀՀ ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանն էլ նշեց, որ Հայաստանը, լինելով ՀԱՊԿ հիմնադիր անդամ, զարգացնում է գործընկերային հարաբերությունները ՆԱՏՕ-ի հետ։
«Այդ առումով մենք ունենք առանձնահատուկ կարգավիճակ։ ՆԱՏՕ-ի շրջանակում մենք իրականացնում ենք ծրագրեր, որոնք բխում են ազգային անվտանգության մեր շահերից»,- նշեց Նահապետյանը։
Նա խիստ կարևորեց ՆԱՏՕ-ի և Ռուսաստանի մոտեցումների մերձեցումը միջազգային անվտանգությանն առնչվող հարցերում, որը կնվազեցնի լարվածության աստիճանը տարածաշրջանում։
Ապրիլյան պատերազմն ուղենշեց, որ Հայաստանը պետք է դիվերսիֆիկացնի իր ուժերը, համոզված է Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը։ Նրա խոսքով` տնտեսության ու անվտանգության ոլորտում պետք է աշխատել բոլոր կառույցների հետ։ ՆԱՏՕ-ի և Եվրամիության հետ համագործակցությունը, Գրիգորյանի բնորոշմամբ, ոչ մեկի դեմ չէ, բայց խիստ անհարժեշտ է Հայաստանին։
«Ժամանակը ցույց է տալիս, որ մարտահրավերները մեծանում են, բայց երբ աշխատում ես մեկ համակարգի հետ, չես կարող պատասխանել այդ մարտահրավերներին։ Դա չի նշանակում, որ փոխվում է արտաքին քաղաքականությունը, բայց նշանակում է, որ կստեղծես այլընտրանքներ, որոնց միջոցով կպաշտպանես հայ ժողովրդի անվտանգությունը, կապահովես զարգացումը»,- ասաց Գրիգորյանը։
Նա տեղեկացրեց, որ կոնֆերանսի բուն նպատակը Վարշավայի գագաթնաժողովի արդյունքները գնահատելն է։
Հիշեցնենք, որ հուլիսին մեկնարկեց Վարշավայի գագաթաժողովը` Հյուսիսատլանտյան դաշինքի անդամ երկրների առաջնորդների մասնակցությամբ։ Ներկաների թվում էր նաև ՀՀ նախագահ Սերժ Սարգսյանը։
