ԵՐԵՎԱՆ, 12 սեպտեմբերի-Sputnik. Վրաստանի նախկին արտգործնախարար Մայա Փանջիկիձեն Հայաստանին ու Ադրբեջանին միևնույն նժարի վրա է դնում կարևորության տեսանկյունից։
«Ես չէի ասի, որ մեզ համար ավելի կարևոր է Ադրբեջանը, քան Հայաստանը, երկուսն էլ մեր հարևաններն են»,-ասաց նա։
Նա ընդգծեց, որ Վրաստանը Հայաստանի հետ միշտ էլ պաշտոնական լավ հարաբերություններ է ունեցել, ինչը չի կարող ասել տնտեսական հարաբերությունների մասին։ Դրանք, նրա դիտարկմամբ, այնքան էլ զարգացած չեն, սակայն առաջընթացի ներուժ նա, այնուամենայնիվ, տեսնում է։
«Ես համամիտ եմ, որ մենք ինտենսիվ տնտեսական հարաբերություններ չունենք, և դրանք պետք է զարգացնել։ Չնայած Վրաստանն ուզում է դեպի ՆԱՏՕ գնալ, իսկ Հայաստանն ուրիշ պլաններ ունի, դա ոչ մի կերպ չի ազդի, որպեսզի ստեղծվեն տնտեսական լավ հարաբերություններ»,-ասաց Փանջիկիձեն։
Նա հիշեցրեց, որ Վրաստանն անկախացումից ի վեր ինտենսիվ կերպով աշխատում է ՆԱՏՕ-ին անդամակցելու ուղղությամբ։ Բայց նա չթաքցրեց, որ իր երկիրն ուզում է նաև լավ հարաբերություններ ունենալ Ռուսաստանի հետ։
«Մենք աշխատում ենք, որ Ռուսաստանի հետ ոչ միայն տնտեսական, այլև քաղաքական լավ հարաբերություններ լինեն, բայց դա այս պահին հնարավոր չէ։ Ես հույս ունեմ, որ ապագայում դա կփոխվի։ Մենք փոքր երկիր ենք, չենք կարող մեզ թույլ տալ այն շքեղությունը, որ որևէ մեկի հետ վատ հարաբերություն ունենաք, բայց տարածքաշրջանային առումով մենք հետաքրքրված ենք, որ բոլորի հետ լավ հարաբերություններ լինեն»,-ասաց Վրաստանի նախկին արտգործնախարարը։
Նրա կարծիքով`ԵԱՏՄ-ին անդամակցությունը Հայաստանի որոշումն է, իսկ իրենք այլ պլաններ ունեն։ Միաժամանակ կանխատեսում է, որ Վրաստանի` ՆԱՏՕ-ին անդամակցությունը Ռուսաստանին, մեղմ ասած, հաճույք չի պատճառի։ Բայց այդ ուղին ընտրելու հարցում իրենց ոչ ոք չի խանգարի։
