ԵՐԵՎԱՆ, 3 հոկտեմբերի — Sputnik, Արմենուհի Մխոյան. Հոկտեմբերի 2-ին գյումրեցին ընտրության էր՝ ընտրեց այն քաղաքական ուժին, որի մանդատների քանակից էլ կախված է, թե ով է ղեկավարելու քաղաքը:
Խախտումներ և դժգոհություններ եղան, բայց ինչ գյումրեցի, եթե իր հնարքով ու հումորով չառանձնանար: Հնարամիտ գյումրեցին ելք էր գտել՝ տարեցների ու հատկապես կույրերի մասնակցության ցուցանիշն էր այս անգամ շատ:
Ընդհանուր առմամբ Ընտրական օրենսգիրքը թույլ է տալիս առողջական խնդիրներ ունեցող քաղաքացիներին ընտրությունն իրականացնել ուղեկցողի ներկայությամբ: Ի դեպ, եթե անձն ունի տեսողական խնդիր, տեղամասերում կան հատուկ խոշորացույցներ, բայց, անշուշտ, կուրության դեպքում թույլատրելի է նաև լրացուցիչ անձի ներկայությունը՝ գրանցամատյանում հատուկ նշումից հետո: Օրենքի այս կետի իմացությունը շատերն օգտագործեցին: Ո՞վ է ճշտելու` կույրը ում օգնությամբ է ընտրատեղամաս եկել ու առավել ևս` քվեախցում իր ընտրությունը կատարել:
Նաև ձայների հաշվարկի ժամանակ հետաքրքիր «բացահայտումներ» եղան: Պարզվում է` գյումրեցին «բոլոր թեկնածուներից զզվի գը» ու իր ձայնը «Արթուր Ալեքսանյանին» ու «Սասնա ծռերին կուդա»:
