ԵՐԵՎԱՆ, 3 հոկտեմբերի — Sputnik. Արմեն Ջիգարխանյանի անունը գրվել է Գինեսի ռեկորդների գրքում որպես ամենաշատ ֆիլմերում նկարահանված ռուսական դերասան։ Նա ունի շուրջ 300 դերակատարում ինչպես հայկական, այնպես էլ ռուսական ֆիլմերում։
Դերասանը չի թաքցնում, որ կյանքում տեսել է ամեն ինչ, լավն ու վատը, ապրել հիասթափություններ։ Շարունակում է վախենալ դրանցից։ Միաժամանակ, ինչպես կայքերից մեկին է խոստովանել, կյանքն ու հիասթափությունները փոխկապակցված են, հետևաբար պետք է կոփվել։
«Պիտի օրգանիզմդ պատրաստ լինի, որ եթե գործ ես անում, ուրեմն գուցե հիասթափվես: Հիասթափությունը, իհարկե, դժվար բան է, այն կարող է մարդուն ոչնչացնել, բայց առանց դրա հնարավոր չի ապրել: Պետք է իմանաս՝ առաջին քայլդ կլինի հիասթափությունը: Ու պետք է հիշել, որ առավոտը կսկսվի հիասթափությունից»,- մի առիթով ասել է նա։
Գուցե հիասթափություններից չվախենալու ու կյանքը սիրելու կարողությունները օգնեցին նրան, որ 80 տարեկանում երրորդ անգամ ամուսնանա։ 2015 թվականին Արմեն Ջիգարխանյանն ու դերասանուհի Վիտալինա Ցիմբալյուկ-Ռոմանովսկայան օրինականացրին իրենց հարաբերությունները։ Ռուսական կայքերից մեկին տված հարցազրույցում կինը խոստովանել է, որ ամուսնական պարտականություններն իր համար սրբություն են։ Այն հարցին, թե ինչ է անում կինը, երբ Ջիգարխանյանը տարիքային առանձնահատկություններից ելնելով իրեն վատ է զգում, կինը պատասխանել է` անմիջապես դիմում է բժշկի։
«Խուճապի չեմ մատնվում։ Նա հիանալի բժիշկներ ունի։ Ես զանգահարում են նրանց, խորհուրդներ եմ ստանում ու առաջին բուժօգնությունը կազմակերպում»,-ասել է կինը։
Զույգը նաև չի բացառել, որ հնարավոր է` երեխա էլ ունենան, չնայած տարիքային` 36 տարվա տարբերությանը։ Ի դեպ, նրանց սիրո պատմությունը սկսվել է, երբ Ջիգարխանյանը 80 տարեկան էր ու հիվանդ։
«Տեղյակ էի, որ նրա ամենասիրած կերպարը Սոկրատն է, ուստի երբ Հունաստան էի մեկնել, այնտեղից Արմենի համար Սոկրատի արձանը գնեցի։ Երբ Մոսկվա եկա, հանդիպեցի նրան և նվիրեցի արձանը։ Երբ Արմենը հիվանդ էր, ամեն օր նրա մոտ հիվանդանոց էի գնում»,-պատմել է Վիտալինան։
Արմեն Ջիգարխանյանը մամուլին տված հարցազրույցներից մեկում նշել է, որ իր մասնագիտությունը կյանքի հետ միահյուսված է, հետևաբար երբ չի խաղում, գլխացավեր է ունենում։
«Հենց հիմա գլխացավ ունեմ»,- կեսկատակ-կեսլուրջ նշել է նա։
Արմեն Ջիգարխանյանն առաջին անգամ բեմ է դուրս եկել 1955 թվականին Երևանում, Ստանիսլավսկու անվան ռուսական դրամատիկական թատրոնում։
1996 թվականից ղեկավարում է Մոսկվայի դրամատիկական թատրոնը։ Նա հիանալի է կերտել դարբին Մուկուչի դերը «Եռանկյունի» ֆիլմում, Լևոն Պողոսյանի դերը «Երբ գալիս է սեպտեմբերը», Օվեչկինի դերը «Անորսալի վրիժառուները» ֆիլմում։
Հարկ է հիշել, որ ԽՍՀՄ տարածքում ամենահայտնի դերասաններից մեկը կինոյի աշխարհ է մտել որպես օպերատորի օգնական «Հայֆիլմ» կինոստուդիայում։
Խորհրդային մշակույթի զարգացման գործում մեծ ավանդի համար Արմեն Ջիգարխանյանն արժանացել է «ԽՍՀՄ Ժողովրդական դերասան»-ի պատվավոր կոչման և պարգևատրվել է կառավարական շքանշաններով։
