ԵՐԵՎԱՆ, 9 հոկտեմբերի — Sputnik, Խաչիկ Չախոյան. Հայաստանի հավաքականի կազմում արդեն նախօրոք պարզ էր, որ բացակայելու է Հենրիխ Մխիթարյանը: Բայց խնդիրները դրանով չավարտվեցին ու սկսվեցին թիմի նախախաղային վարժանքի ժամանակ:
Նախապես մեկնարկային կազմում հայտավորված էր հարձակվող Գեղամ Կադիմյանը, սակայն «Կարպատների» հարձակվողը նախավարժանքի ժամանակ վնասվածք ստացավ, համենայնդեպս արագորեն մեկնարկային կազմում հայտավորվեց Վարդան Պողոսյանը: Երկրպագուները տրամադրվեցին խաղին. նման բաներ լինում են: Բայց արդեն երկրորդ րոպեին նոր «անակնկալ» էր սպասվում:
Անկյունայինի փոխանցումից հետո Հայաստանի դարպասին հետևած հարվածը Գոռ Մալաքյանը փորձեց հետ մղել ու խաղաց ձեռքով: Անմիջապես հետևեց կրկնակի պատիժը: Մալաքյանը հեռացվեց ու մեր դարպասին ստացանք 11 մետրանոց հարված: Բոգդան Ստանկույի դիպուկ հարվածից հետո Հայաստանի թիմը փլուզվեց:
Այլ բառ դժվար է գտնել, որովհետև արդեն 12-րդ րոպեին հայերը պարտվում էին 0:3 հաշվով: Մնալով տասը խաղացողներով և պարտվելով երեք գնդակի տարբերությամբ՝ արդեն դժվար էր հավատալ հրաշքի:
Հայ ֆուտբոլիստներից ոչ ոքին առանձնացնել հնարավոր չէ, անգամ մեծ ցանկության դեպքում: Առանց Հենրիխ Մխիթարյանի և Յուրա Մովսիսյանի հավաքականը խաղեր անցկացրել է (հիշենք Հայաստան — Սերբիա խաղը): Եվ ի՞նչ: Թիմը այդ խաղում նույնպես շատ ծանր վիճակում էր, բայց ոչ-ոքին այդ խաղից հետո ցավալի արդյունք համարվեց, որովհետև հայերը պատասխան գնդակն ընդունեցին խաղավերջում ու մինչ այդ էլ չէին իրացրել 11 մետրանոցը:
Հայաստանի հավաքականը, մեղմ ասած, ձախողեց այս խաղը, ու հիմա էլ շատ մեծ հարց է՝ նման խաղով կկարողանա՞ միավոր վաստակել խմբում, թե ոչ: Հայաստանի ընտրանին լուրջ խնդիրների առաջ է կանգնած և՛ կազմի առումով, և՛ հետևաբար խաղի առումով: Ֆուտբոլում նման իրավիճակներում ասում են, որ պարտվել է մարզիչը: Հայաստանի հավաքականի գլխավոր մարզիչ Վարուժան Սուքիասյանն այս պարտության «մեղքն» արդեն վերցրել է իր վրա, սակայն հայտարարել է նաև, որ այնքան տղամարդկություն ունի, որ չթողնի թիմն այսպիսի վիճակում»:
Մի քանի օր անց Հայաստանի հավաքականը մրցելու է Լեհաստանի հավաքականի հետ մրցակցի հարկի տակ: Ի՞նչ սպասելիքներ ունի հայ երկրպագուն այսօրվա նոկդաունից հետո:
Ամբողջ խաղի ընթացքում Հայաստանի հավաքականը չուներ գոլային պահ, բացառությամբ մի դրվագի, որը ստեղծվեց Արազ Օզբիլիսի անցումից հետո: Ինչպես և Դանիայի հետ խաղում, Մարկոս Պիզելին չիրացրեց գոլային հնարավորությունը: Գոռ Մալաքյանի հեռացումից հետո հենակետային գոտին պարզապես չդիմացավ մրցակցի ճնշմանը: Պաշտպաններն էլ արժանի օգնություն չստանալով խաղընկերներից սկսեցին սխալվել: Գաել Անդոնյանի նման սառնասիրտ ֆուտբոլիստը տարրական սխալ թույլ տալով պարզապես գոլ նվիրեց մրցակցին, իսկ հետո էլ չկարողացավ շարունակել հանդիպումը:
Հայաստանի հավաքականը հայտնվել է ծանր հոգեբանական վիճակում: Բայց թիմի կազմում կան ֆուտբոլիստներ, որոնք բազմաթիվ խաղեր են անցկացրել հավաքականի կազմում: Ու՞ր է թիմի ոգեշնչվածությունը, ու՞ր են տղաների խելացի ու սլացիկ փոխանցումների միջոցով գրոհները: Մի՞թե հայ երկրպագուն պետք է ապրի միայն հիշողություններով: Հայաստանի թիմն արժանի չէր նման հաշվով պարտության, բայց արդարացի լինենք՝ Ռումինիան արժանի հաղթանակ տարավ:
