ԵՐԵՎԱՆ, 12 հոկտեմբերի — Sputnik, Խաչիկ Չախոյան. Իհարկե, մարդիկ իրենց կյանքի ընթացքում ձգտում են անընդհատ կառուցել ապագան, սակայն առանց անցյալը հիշելու և անցյալի արդյունքների վրա հիմնվելու դա անելը գրեթե անիրական է: Այսօր էլ հայկական ֆուտբոլում որոշակի խնդիրների պայմաններում մենք չենք կարող մոռանալ այն թիմին և այն մարդկանց, ովքեր կերտեցին մեր ակումբային ֆուտբոլի անենանշանակալի հաղթանակը:
«Արարատ-73»-ի ֆենոմենը դեռ երկար ենք հիշելու: Իսկ այդ թիմի հաղթանակների հիմնական կառուցողն այսօր իր ծննդյան տոնն է նշում: Նիկիտա Սիմոնյանը 90 տարեկան է: Չնայած տարիքին` լեգենդար անձնավորությունը շարունակում է մնալ ֆուտբոլում ու ծառայել միլիոնների խաղին: Իր ամբողջ կյանքի ընթացքում Սիմոնյանը հավատարիմ մնաց ֆուտբոլին ու գնդակին: Իսկ նրա հմտությունը թիմերի հետ աշխատանքում 70-ականների սկզբում զգացինք բոլորս:
Արտյոմ Ֆալյանի, Էդուարդ Գրիգորյանի, Ալեքսանդր Պոնոմարյովի և Նիկոլայ Գլեբովի ստեղծած ու պատրաստած թիմը հայտնվեց Նիկիտա Պավլովիչի ձեռքերում: Եվ նա կարողացավ օգտագործել իրեն նախորդած մարզիչների աշխատանքն ու իր ավանդը ներդնելով «Արարատի» խաղի մեջ` կերտեց Մեծ հաղթանակը: Մելբուռնի օլիմպիական խաղերի չեմպիոնը մեր ազգի առայժմ միակ ներկայացուցիչն է, որը կրում է օլիմպիական չեմպիոնի կոչումը ֆուտբոլում:
Ֆուտբոլիստների ու այս խաղի երկրպագուների շրջանում հարազատ դարձած Պալիչն այսօր հոբելյար է։
