ԵՐԵՎԱՆ, 24 հոկտեմբերի — Sputnik. Անվանի հայ դերասան Սոս Սարգսյանը կդառնար 87 տարեկան։ Թեև նա այլևս մեզ հետ չէ, այնուամենայնիվ նա միշտ կապրի մեր սրտերում։
Մեծ վարպետի ծննդյան օրը Sputnik Արմենիան ընթերցողներին է ներկայացնում նրա հետաքրքրիր արտահայտությունների ընտրանին, որոնք վերցված են Սարգսյանի հարցազրույցներից և ելույթներից։
Մարդն ինքն իր դատավորն է, ես հաճախ եմ հիշում իմ սխալները, թերությունները, որոնց համար հանդիմանում եմ ինձ։ Կան բաներ, որոնք ինքս ինձ չեմ կարող ներել։
Անհրաժեշտ է միշտ լսել սրտի և հոգու կանչը։
Ինձ միշտ խիղճս տանջել է և հետապնդել է մեղքի զգացումը, երբ ես կարող էի աշխատել, բայց չեմ աշխատել կամ չեմ կատարել իմ պարտականությունները։
Աշխատանքը և մնացածը դատարկ բաներ են։ Կինը պետք է մայր լինի, որպեսզի երջանիկ լինի։
Մենք` հայերս, խիստ ազգ ենք, որովհետև մեր մեջ դառնությունը շատ է, բայց միաժամանակ հյուրընկալ ենք։
Ինչու՞ ենք մենք ծնվել, ո՞րն է մեր առաքելությունը, ինչու՞ ենք մահանում, ի՞նչ ենք արել այս աշխարհում։ Ես արվեստի մարդ եմ և երբեք երջանիկ չեմ եղել։
Ես Թումանյանի ճուտն եմ: Եթե նրա իմաստնության մի տոկոսն ունենամ, գոհ սրտով կգնամ էս աշխարհից: Էս մարդուն ոչ մեկս չենք ճանաչում: Նա գանձ է, անտակ գանձ։
Ես չեմ հասցրել ապրել ինձ համար։ Դերասանի կյանքը շատ հետաքրքիր է ու հարուստ. ուրիշի կյանք, գործունեություն, ուրիշ մարդիկ, որոնք անցնելով քո սրտով և հոգով` մասամբ քոնն են դառնում…
Մենակ թե խնդրում եմ Աստծուն՝ հոգիս դեռ չառած՝ միտքս չառնի։
Ես հոգնել եմ, հոգնել եմ ապրելուց, հասկանո՞ւմ եք՝ ամեն ինչ իր ժամանակն ունի. սկսվել է, պիտի ավարտվի: Իմն ավարտվել է, ես զգում եմ:
