ԵՐԵՎԱՆ, 25 հոկտեմբերի — Sputnik. Կիրակի օրը Մոսկվայում սպանել են երկու հայի՝ Մալաթիա թաղամասի բնակիչներ Արմեն Իսրայելյանին՝ «Ձուկ» կամ «Ձկնկուլ» մականունով, և նույն թաղի բնակիչ Էդուարդ Նշանյանին, որի մականունը «Ճուտ» էր, գրում է «Հրապարակ» թերթը։
«Այս սպանությունն անմիջապես դարձավ օրվա թոփ-իրադարձությունը, քանի որ սպանվածներից մեկը՝ Արմեն Իսրայելյանը, ԱԺ պատգամավոր Սամվել Ալեքսանյանի հետ հին հաշիվներ ուներ և հունիսին նույնիսկ հարցազրույցներ էր տվել թերթերին, մասնավորապես՝ Նիկոլ Փաշինյանի և նրա թերթի օգնությանն էր դիմել և հայտնել, որ պատգամավորն ունեզրկել է իրեն, խլել ողջ բիզնեսը, առևանգել է իրեն և մի քանի օր պահել պահեստներից մեկում», — գրում է թերթը։
«Հրապարակ»-ի տեղեկություններով, սպանությունը կատարել է դիպուկահարը։ Երկու սպանվածներն էլ գլխի շրջանում հրազենային վնասվածքներ ունեն։ Սա նշանակում է, որ կրակողը պրոֆեսիոնալ է եղել և գործը սառնասրտորեն է կատարել։
