Արման Բոշյանի խոսքով` պետք է փաստել, որ աշխարհում չկա որևէ այլ երկիր, բացի ԱՄՆ-ից, որի նախագահի ընտրություններին այդպես ուշադիր կհետևեն ամբողջ աշխարհի մարդիկ։
«Գրեթե ամբողջ աշխարհը, հատկապես հետխորհրդային տարածքի ժողովուրդները, հետևում են անդրօվկիանոսյան հեռավոր երկրի նախագահի ընտրությանը։ Սա փաստում է, որ աշխարհում ստեղծված համակարգը իսկապես միաբևեռ է։ Համենայն դեպս այդպես է ընկալվում»,- նշում է Բոշյանը։
Ըստ նրա` վերջին հինգ տարվա մեջ աշխարհն իր միաբևեռ տեսքը փոխում է, դառնում է բազմաբևեռ, այսինքն տարբեր ուժային կենտրոններ հզորացել են, և կատարվում է ուժերի ազդեցության գոտիների բաշխում։
«Աշխարհի աշխարհաքաղաքականությունը և երկրների կողմնորոշումն արդեն սկսում են վերաֆորմատավորվել` ելնելով նրանից, որ ԱՄՆ-ի ազդեցությունը թուլանում է հատկապես Մերձավոր Արևելքում, և գերտերությունների միջև առկա լարվածությունն այնքան է մեծացել, որ հետագա քայլը կարող էր լինել պարզ ռազմական բախումը»,- նշեց Բոշյանը։
Ըստ նրա` դա արտահայտված էր առաջին հերթին Սիրիայի հարցում, ինչը հայերի համար ճակատագրական կարևորություն ունի, քանի որ այնտեղ հայեր և քրիստոնյաներ են ապրում։ Իսկ այսօր միակ ուժը, որը պաշտպանում է հայերին, Սիրիայի նախագահ Բաշար ալ Ասադն է։
