ԵՐԵՎԱՆ, 10 նոյեմբերի — Sputnik. Հայաստանի անդամակցումը Եվրասիական տնտեսական միությանը որակական նոր մակարդակի բարձրացրեց մեր համագործակցությունը Ռուսաստանի հետ, երկու երկրների օրենսդիր մարմինների համագործակցության գծով միջխորհրդարանական հանձնաժողովի 28-րդ նիստի բացմանն ասաց հայկական Խորհրդարանի փոխխոսնակ Հերմինե Նաղդալյանը։
«Եվրասիական տնտեսական միությանը Հայաստանի անդամակցության համատեքստում մեր ռազմավարական համագործակցությունը որակական նոր մակարդակի վրա բարձրացավ։ Երկկողմ հարաբերությունների լայն շրջանակում կարևորագույն տարրերից մեկն է տարեցտարի ակտիվացող հայռուսական միջխորհրդարանական համագործակցությունը», — ասաց Նաղդալյանը։
Նաղդալյանն ընդգծեց, որ Հայաստանն ու Ռուսաստանը կապված են ոչ միայն առևտրատնտեսական համագործակցությամբ, այլև պատմական, մշակութային և հումանիտար կապերով։
ԱԺ փոխխոսնակը կարևորեց նաև երկու երկրների փոխգործակցությունը զբոսաշրջության ոլորտում։ Վերջին շրջանում, ըստ նրա, կարելի է խոսել Հայաստանում ռուս զբոսաշրջիկների թվի աճի մասին։ Ռուսաստանի Դաշնային խորհրդարանի անդամ Նիկոլայ Ռիժկովը նույնպես ընդգծեց միջկառավարական կապերի կարևորությունը, որոնք նպաստում են երկու երկրների դաշնակցային հարաբերությունների ամրապնդմանը։
Նրա խոսքով` մշակույթի և զբոսաշրջության ոլորտում երկկողմ կապերի զարգացումը թույլ կտա էլ ավելի ամրապնդել մեր երկրների միջև առկա հարաբերությունները։
«Սերտ հոգևոր և մշակութային կապերը չեն թուլացել մեր երկրների միջև նույնիսկ ամենածանր տարիներին։ Համոզված եմ, որ այդպես կլինի միշտ», — ասաց Ռիժկովը։
Նա հույս հայտնեց, որ Հայաստանի նոր վարչապետն ու կառավարությունը կգտնեն տնտեսական խնդիրները լուծելու ուղիներ, ինչը թույլ կտա բարելավել երկրի սոցիալ-տնտեսական կյանքը. մի երկրի, որտեղ բնակչության 30 տոկոսն աղքատ է։
