ԵՐԵՎԱՆ, 16 նոյեմբերի — Sputnik. Վիգեն Սարգսյանը լրատվամիջոցների ղեկավարների հետ հանդիպման ժամանակ, որին ներկա է եղել նաև Sputnik Արմենիայի գլխավոր խմբագիր Ալինա Օրդյանը, անդրադարձել է զինծառայողներին աջակցող հիմնադրամ ստեղծելու և քաղաքացիներից 1000-կան դրամներ գանձելու մասին նախագծին։
«Չէի ցանկանա` 1000 դրամի գաղափարը շփոթեին ազգ-բանակ հայեցակարգի հետ: Չէի ցանկանա, որ դա ընկալվեր որպես դրամահավաք: Այստեղ քաղաքական դիվիդենտ չկա. սրանով ցույց ենք տալիս, որ յուրաքանչյուրը հավասար պատասխանատվություն ունի այն ընտանիքների նկատմամբ, որոնք երկրի պաշտպանության գործում զոհաբերել են ամենաթանկը»,- ասաց նախարարը։
Նրա խոսքով` բյուջեի այլ միջոցներից հնարավոր էր, իհարկե, հատկացնել, սակայն դա արդյունավետ չէր լինի:
«Եվ 1000 դրամը հորինած թիվ չէ, հստակ տնտեսագիտական հաշվարկ է արվել: Սակայն սա փոխհատուցում չէ, որովհետև չկա փոխհատուցման այդպիսի գին կյանքը, առողջությունը կորցրած մարդուն երախտագիտություն հայտնելու համար: Այս նախաձեռնությունը մեկ խնդիր է լուծում՝ յուրաքանչյուրը կանգնած է այդ ընտանիքների կողքին: Նպատակն է ՝ ֆիքսել հավասար մասնակցությունը»,- ասաց նախարարը:
Վիգեն Սարգսյանը կոչ արեց պատգամավորներին, որ օրինագիծն ընդունվի միաձայն կամ գոնե առանց դեմ ձայների:
Հայրենիքի պաշտպանության ժամանակ կյանքը զոհված և առողջությունը վնասած զինծառայողներին և նրանց ընտանիքիներին հատուցելու համար կառավարությունը կներդնի նոր համակարգ: Դրա հիմնասյունը լինելու է հատուկ հիմնադրամը, որի միջոցները ձևավորվելու են նվիրատվություններից, փոխառություններից, դրամաշնորհային գումարներից, հիմնադրամի սկզբնական միջոցներից, նաև յուրաքանչյուր աշխատող քաղաքացու աշխատավարձից պարտադիր գանձվող 1000 դրամ գումարից:
Զոհվածների և 1-ին խմբի հաշմանդամություն ստացած զինծառայողների ընտանիքները միանվագ կստանան 10 մլն դրամ, 2-րդ խմբի հաշմանդամները՝ 5 մլն, իսկ հետագայում՝ 20 տարվա ընթացքում, կստանան ամսական 300 հազար դրամ: Սպաների համար այդ գումարը կկազմի ամսական 300 հազար դրամ, ենթասպաների համար՝ 250 հազար դրամ, շարքայինների համար՝ 100 հազար դրամ: Այսինքն, սպային կամ նրա ընտանիքին 20 տարվա ընթացքում կհատկացվի 82 մլն դրամ, ենթասպաներին՝ 70 մլն, շարքայիններին՝ 58 մլն։ II խմբի հաշմանդամություն ստացած զինծառայողներն ամսական կստանան 200 հազար դրամ, 150 և 100 հազար դրամ համապատասխանաբար։ Դրամական միջոցները կստանան զինծառայողների ծնողներն ու երեխաները, ինչպես նաև մինչև 23 տարեկան եղբայրներն ու քույրերը։
