ԵՐԵՎԱՆ, 9 դեկտեմբերի — Sptunik. Դեկտեմբերի 9-ին, Կիևում տեղի ունեցավ հայ և ուկրաինացի ժողովուրդների անմեղ զոհերի հիշատակին նվիրված խաչքարի բացումը: Այս մասին հայտնում է Ուկրաինայի հայերի միության մամուլի ծառայությունը: Բացման հանդիսավոր արարողությանը մասնակցեցին Ուկրաինայում Հայաստանի դեսպան Անդրանիկ Մանուկյանը, Գոլոսեևսկու շրջանային պետական ադմինիստրացիայի նախագահ Նատալյա Բոնդարը, Կիևի հայ համայնքի ղեկավար Նորիկ Գևորգյանը, Ուկրաինայի ժողովրդական պատգամավորները, Կիևի քաղաքային խորհրդի պատգամավորները, Ուկրաինայի ուղղափառ, հունա-կաթոլիկ և հռոմեա-կաթոլիկ եկեղեցիների ներկայացուցիչները, ինչպես նաև մայրաքաղաքի մի շարք հասարակական գործիչներ:
Հայկական խաչքարի տեսքով կերտված հուշարձանը օծեց Հայ առաքելական եկեղեցու ուկրաինական թեմի առաջնորդ եպիսկոպոս Մարկոս Հովհաննիսյանը:
Խաչքարը տեղադրվել է Ուկրաինայում հայերի միության, Կիևի Գոլոսեևսկի շրջանի հայկական սփյուռքի, Ուկրաինայում Հայաստանի դեսպանատան, Հայ առաքելական եկեղեցու ուկրաինական թեմի, ինչպես նաև Կիևի հասարակական կազմակերպությունների ջանքերով: 2010 թվականի նոյեմբերին խաչքարն ընդգրկվեց ՅՈՒՆԵՍԿՕ-ի մարդկության ոչ նյութական մշակութային ժառանգության ցուցակում:
