ԵՐԵՎԱՆ, 16 դեկտեմբերի, Sputnik. ԱԿԲԱ-ԿՐԵԴԻՏ ԱԳՐԻԿՈԼ բանկի հասարակության հետ կապերի պատասխանատու Նարեկ Ասատրյանը Sputnik Արմենիայի հետ զրույցում հայտնեց, որ թեև բանկոմատն ապահովված է եղել անվտանգության համակարգով, բայց դեռ պարզ չէ ոստիկանությունը պայթուցիկի տեղադրման ժամանակ բանկոմատից ահազանգ ստացե՞լ է, թե՞ ոչ։ Նա խորհուրդ տվեց այդ հարցով դիմել Ոստիկանությանը: Ոստիկանությունն էլ առայժմ կատարված դեպքի վերաբերյալ լրացուցիչ տեղեկություններ չի տրամադրում:
Նարեկ Ասատրյանը հայտնեց նաև, որ բանկոմատի վրա տեղադրված է եղել տեսախցիկ: ՙԱյդ բանկոմատը այնպիսի տեղում է, որ բոլոր կողմերից նկարահանվում է: Սարյան փողոցում գտնվող բոլոր խանութների վրա այդ տարածքում տեսախցիկներ կան՚,- ասաց նա:
Ի դեպ, պայթեցված տեսախցիկը, ինչպես հայտնեց մեր զրուցակիցը, ոչ թե որևէ շենքի պատի մեջ է տեղադրված եղել, այլ առանձին՝ փողոցում: Դատելով այն հանգամանքից, որ պայթյունը քանդել է բանկոմատի բավական հաստ պատերը` Նարեկ Ասատրյանը եզրակացնում է, որ պայթյունը շատ հզոր է եղել:
Իսկ թե որքան գումար են կարողացել բանկոմատից հափշտակել, բանկի ներկայացուցիչը չհայտնեց: Մամուլի այն տեղեկությունները, թե հափշտակված գումարը եղել է 7-8 մլն դրամին համարժեք՝ Նարեկ Ասատրյանը ո՛չ հերքեց, ո՛չ հաստատեց:
Այսօր գիշերը 4:30-ին պայթուցիկի գործադրմամբ կողոպուտի փորձ էր կատարվել նաև Բաղրամյան փողոցում գտնվող ՎՏԲ-Հայաստան Բանկի բանկոմատից:
Սակայն, ինչպես Sputnik Արմենիային հայտնեց ՎՏԲ-Հայաստան Բանկի հասարակության հետ կապերի պատասխանատու Լալի Սվիմոնիան, հանցագործներին չի հաջողվել իրականացնել կողոպուտը, բանկոմատին հասցվել է աննշան վնաս։
