ԵՐԵՎԱՆ, 20 դեկտեմբերի — Sputnik. «Երկրաշարժ» ֆիլմի վարձույթը արդեն ավարտին է հասնում, և այն հասցրել է դիտել շուրջ մեկ միլիոն մարդ, այդ մասին Facebook-ի իր էջում գրել է ֆիլմի ռեժիսոր Սարիկ Անդրեասյանը։
«Արդեն ավարտին է մոտենում մեր «Երկրաշարժ» ֆիլմի վարձույթը։ Միայն կինոթատրոններում մեր ֆիլմը դիտել է շուրջ մեկ միլիոն մարդ։ Հազարավոր շնորհակալական նամակներ եմ ստացել ու կարդացել ֆիլմի մասին հազարավոր հիասքանչ արձագանքներ։ Այժմ համոզված եմ, որ երբ իմ երեխաները մեծանան, նրանք ասելու են, որ այս ֆիլմն իրենց հայրն է նկարահանել», — գրել է Անդրեասյանը։
Նրա խոսքով` այնքան երջանկություն և առողջություն, որքան նրան ցանկացել են մարդիկ՝ սկսած դեկտեմբերի 1-ից, կբավականացնի մի քանի տարվա համար, նույնիսկ եթե տիեզերքը կարդա այդ բարեմաղթանքների միայն տասը տոկոսը։
Անդրեասյանը նշել է, որ կյանքում ամենակարևորը սերն է ու ժամանակը և կոչ է արել բոլորին սեր սփռել շուրջը, նվիրել այն բոլորին, ովքեր արժանի են դրան, քանի դեռ ժամանակ կա։ Հենց այդ մասին է, ռեժիսորի խոսքով, նրա ֆիլմը։ Նա նաև գրել է, որ սեր է փոխանցում իր յուրաքանչյուր հանդիսատեսին և գործընկերոջը, որոնք կողքին են եղել։
