ԵՐԵՎԱՆ, 19 մարտի — Sputnik. ՀՀԿ փոխնախագահ, ՀՀ վարչապետ Կարեն Կարապետյանն ընտրողների հետ հանդիպմանը նշել է, որ կառավարությունն ընդհանուր առմամբ, նախատեսում է շուրջ 3.2 միլիարդ դոլարի ներդրում կատարել, որից միայն 830 միլիոն դոլարը կիրականացվի այս տարի:
«Լոռու մարզում սպասվող 151 միլիոն դոլարի ներդրումով նախատեսում ենք շուրջ 2500 աշխատատեղ ստեղծել»,- ասել է նա:
Կարեն Կարապետյանի խոսքով՝ յուրաքաչյուր համայնքից պահանջել են 5 տարվա զարգացման ծրագիր, որոնցով հնարավոր կլինի զարգացնել համայնքները, լուծել խնդիրները:
Ընտրողներից մեկը Կարեն Կարապետյանին խնդրել է կարի ֆաբրիկա ստեղծել Ալավերդիում:
«Մենք Սովետական միությունում չենք ապրում, երբ պետությունը գործարաններ էր ստեղծում: Այսօր մենք այնպես պետք է անենք, որ մարդիկ գործարաններ բացեն, պիտի գործարարի կողքին կանգնենք, նախադրյալներ ստեղծենք: Ինքս նույնիսկ մտածում եմ, որ այն պետական հիմնարկները, որոնք որոշակի բիզնես են պարունակում, տանք գործարարին կոռուպցիոն ռիսկերը բացառելու համար»,- ասել է Կարեն Կարապետյանը:
ՀՀ վարչապետը նաև խորհուրդ է տվել իրեն դիմած կնոջը:
«Ձեր ամուսինը, երբ երեկոյան տուն է գալիս, բզեք-ասեք, որ մենք էլ ենք ուզում աշխատել, միասին մտածեք, հետո էլ համայնքապետին բզեք, որ եթե այ այսպես անենք, այսպիսի արդյունք կունենանք»,- ասել է վարչապետը:
Նշենք, որ քարոզարշավի ավարտին 11 օր է մնացել: Աժ ընտրությունները նախատեսված են ապրիլի 2-ին:
