ԵՐԵՎԱՆ, 27 մարտի — Sputnik. Այս մասին լրագրողներին հայտնեց ԵԱՀԿ Մինսկի խմբի ամերիկացի համանախագահի ժամանակավոր պաշտոնակատար Ռիչարդ Հոգլանդը:
«Կա բարձր մակարդակով հանդիպման պայմանավորվածություն: Մենք փորձում ենք գտնել միջավայրը, որտեղ կարող է տեղի ունենալ այդ հանդիպումը: Այս պահին կա որոշակի գործընթաց, դա գաղտնիք չէ, դուք գիտեք, որ Հայաստանի և Ադրբեջանի արտաքին գործերի նախարարները Մոսկվայում առանձին հանդիպումներ են ունեցել: Կարծում ենք, որ մոտ ապագայում երկու արտգործնախարարները միասին կհանդիպեն նախագահների հանդիպում պատրաստելու նպատակով»,- ասել է Հոգլանդը:
Նրա խոսքով՝ հակամարտող կողմերը պետք է նստեն բանակցային սեղանի շուրջ և բաց խոսեն, հասկանան, թե ինչպես կարելի է հասնել հակամարտության խաղաղ կարգավորման: Հոգլանդն ընդգծեց, որ պետությունների ղեկավարները կարող են հանդես գալ պատերազմի, բռնության կոչերով, սակայն դրանք պետք է մնան ընդամենը բառեր ու երբեք չվերածվեն գործողության:
Նա հավելեց, որ իրենք կապի մեջ են հակամարտության բոլոր կողմերի հետ: «Վաղը մենք Լեռնային Ղարաբաղ ենք ուղևորվում` հանդիպելու ենք Ստեփանակերտի իշխանությունների հետ: Բռնությունը ելք չէ, մենք պետք է փորձենք ամենադրական լուծումները գտնել»,-ասաց Հոգլանդը։
Նրա խոսքով` ԵԱՀԿ Մինսկի խումբը խրախուսում է բանակցային գործընթացի շարունակությունը։
