ԵՐԵՎԱՆ, 25 մայիսի — Sputnik. 2018 թվականի ԱՄՆ-ի բյուջեի շրջանակներում Հայաստանին հատկացված օգնության կրճատումը, հաստատում է, որ Միացյալ Նահանգներին ավելի շատ հետաքրքրում են աշխարհի այլ տարածաշրջանները, Sputnik Արմենիային ասել է քաղաքագետ Երվանդ Բոզոյանը։
2018 թվականին Թրամփի վարչակազմը կտրուկ կկրճատի բյուջեից Եվրոպայի և Ասիայի երկրներին տրամադրելիք ֆինանսական օգնությունը։
«Ես չեմ կարծում, որ Հայաստանի, Վրաստանի և Ադրբեջանի նկատմամբ ԱՄՆ քաղաքականությունը փոխվել է հենց Թրամփի պատճառով։ Բացառված չէ, որ ամեն ինչ նույն կերպ կդասավորվեր, նույնիսկ եթե նախագահի մյուս թեկնածուն ընտրվեր», — ասաց Բոզոյանը։
ԱՄՆ-ը մեծ ուշադրություն չի դարձնում Եվրասիայի երկրներին, թեև, իհարկե, Քլինթոնն ավելի լուրջ կլիներ դրանց նկատմամբ, կարծում է փորձագետը։
«Սակայն ԱՄՆ-ի համար առավել կարևոր են Մերձավոր Արևելքի, Կենտրոնական Ասիայի հարցերը, Չինաստանի հետ հարաբերությունները, քան Հարավային Կովկասը», — ասաց Բոզոյանը։
Նա օրինակ բերեց Սաուդյան Արաբիայում կնքած 250 մլրդ դոլարի պայմանագրերը։ Այդ գումարի համեմատ Ուկրաինա, Վրաստան և այլ երկրներ չնչին գումարներ են գնում։
Նրա խոսքով` օգնությունն այդ երկրներին առանց այդ էլ սիմվոլիկ էր, և զգալի կրճատումը նույնպես ԱՄՆ-ի համար որևէ կարևոր նշանակություն չունի։ Մայիսի 23-ին հրապարակած Դոնալդ Թրամփի վարչակազմի բյուջետային առաջարկներն ԱՄՆ-ի Կոնգրեսին 2018 ֆինանսական թվականի համար, Հայաստանի օգնությունը կրճատելու է 67% —ով` 20,4 մլն դոլարից հասցնելով մինչև 6,8 մլն դոլարի։ Բյուջեն, ընդհանուր առմամբ, խորհուրդ է տրվում կրճատել 29%-ով, և 60%-ով` Եվրոպայի և Եվրասիայի երկրների համար։
