«Եթե մենք թույլ տանք, որ ամեն մի հաջորդ սերունդ վերանայի, մաքրագրի, սրբի նախորդ պատմությունները, ապա մենք երբեք պատմություն չենք ունենա»,- Sputnik Արմենիա մամուլի կենտրոնում ասաց ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը։
«Եկեք ընդհանրապես մեր մեջ հասկանանք, որ չի կարելի ամեն նոր ալիքով սրբել նախորդ ալիքի բերած ավազը, այդ դեպքում երբեք ցամաք, հող չես ունենա»,- ասաց նա:
Աշոտյանի համար հատկապես վիրավորական է Լենինգրադյան փողոցի վերաբերյալ հարցադրումը։
«Այն հիմնավորումները, որոնք հնչում են կոնկրետ այս փողոցի առնչությամբ, ինձ որպես մի ընտանիքի ներկայացուցչի, որտեղ եղել են մարդիկ, ովքեր Լենինգրադի պաշարման ժամանակ նաև տանջվել ու զոհվել են, ինձ համար վիրավորական է, որովհետև երբ Լենինգրադը դարձավ Սանկտ Պետերբուրգ, համաշխարհային պատմության դասագրքերում լենինգրադյան բլոկադան չվերանվանվեց սանկտպետերբուրգյան բլոկադայի, դա զավեշտ է, նման բան չի եղել»,- ընդգծեց ԱՇոտյանը:
Նրա խոսքով` Լենինգրադը ոչ թե ռուսական երկրորդ քաղաքն է, այլ մեր նորագույն պատմության մեջ վայր, որտեղ տասնյակ հազարավոր հայեր են նահատակվել:
Աշոտյանն ընդգծեց` նման տեսակի ռևիզիոնիզմն իրեն դուր չի գալիս:
