ԵՐԵՎԱՆ, 10 մարտի — Sputnik. Ֆիլիպիններում հայտնի Philstar պարբերականը որոշել է իր ընթերցողներին ներկայացնել հայերին ու Հայաստանը։
«Ի՞նչ ընդհանուր բան կա Շերի, Քարդաշյանի, Անդրե Աղասիի, Ազնավուրի ու նույնիսկ Սթիվ Ջոբսի միջև» վերնագրով հոդվածում հարցի պատասխանը հնչում է հենց սկզբում. «Ընդհանրությունը մեկն է. բոլորը հայ են»։
Նյութի հեղինակները փորձել են մի քանի պարբերությամբ պատմել Հայաստանի բնության, խոհանոցի ու կինեմատոգրաֆիայի մասին։
«Ժամանակին Հայաստանը ծովից ծով էր ձգվում` Կասպից ծովից մինչև Միջերկրական։ Հայաստանի պատմության սև էջը 1915 թվականն է, երբ Առաջին համաշխարհային պատերազմի ժամանակ տեղի ունեցավ Հայոց ցեղասպանությունը։ Թուրքական իշխանությունն իրագործում էր հայերին ոչնչացնելու իր ծրագիրը։ Արդեն 1920 թվականին միլիոնավոր հայեր փախան Օսմանյան կայսրությունից ու ապաստան գտան աշխարհի տարբեր երկրներում։ Հենց այդ պատճառով են հայտնի հայերը Հայաստանից դուրս են ծնվել ու ապրում են տարբեր երկրներում»,– նշված է հոդվածում։
Նյութի հեղինակները խոսել են նաև Երևանի տեսարժան վայրերի, մասնավորապես Մատենադարանի մասին։ Նրանք խորհուրդ են տվել սեփական աչքերով տեսնել այնտեղ պահվող ձեռագրերը։
«Հայերը մեզ խանգարում են». Արգենտինայում Թուրքիայի դեսպանի մոտ սրվել է «օսմանյան ալերգիան»
Հոդվածի հեղինակները հավանել են պանիրն ու թանը, որը նրանց համար «հայկական յոգուրտ» է։
Հետաքրքրական է, որ ընդամենը մի քանի օր առաջ Հայաստանի մասին մեծ ճանաչողական նյութ էր հրապարակվել ասիական մեկ այլ պարբերականում` սինգապուրյան Singapore Tatler–ում։ Այդ հոդվածի հեղինակները խորհուրդ էին տալիս Հայաստան այցելել ու շրջել տեսարժան վայրերով։
