ԵՐԵՎԱՆ, 9 նոյեմբերի — Sputnik. Կորոնավիրուսի տարածումը կանխարգելելու նպատակով Ազգային գրադարանի ընթերցողների սպասարկումը նոյեմբերի 10-22-ը ներառյալ դադարեցվում է: Տեղեկությունը հրապարակվել է գրադարանի ֆեյսբուքյան էջում։
Մինչ բնականոն աշխատանքին վերադառնալը գրադարանը կշարունակի առցանց պատասխանել ընթերցողների հարցերին, տեղեկատվություն տրամադրել էլեկտրոնային շտեմարանների մասին:
«Կշարունակենք ձեզ օգնել և ուղղորդել փնտրումների և հասանելի թվայնացված գրականությունից օգտվելու հարցում: Իսկ բոլոր այն քաղաքացիները, որոնք այս ընթացքում կցանկանան գրանցվել և ձեռք բերել Հայաստանի ազգային գրադարանի ընթերցողական տոմս, հոգ չէ. գրանցումը ևս կարող ենք առցանց կազմակերպել»,-նշված է հաղորդագրության մեջ:
Հայաստանի ազգային գրադարանի ընթերցողական տոմս ձեռք բերելու համար անհրաժեշտ է լրացնել ընթերցողների էլեկտրոնային գրանցման հայտը և ուղարկել nla.circulation@gmail.com էլեկտրոնային հասցեին:
Նշենք, որ Հայաստանում կորոնավիրուսով վարակվածների թիվն արդեն հասել է 107466-ի։
