ԵՐԵՎԱՆ, 25 մայիսի - Sputnik. ՀԱՊԿ–ը և ՀԱՊԿ անդամ պետությունները պետք է ավելի հստակ արտահայտվեն Սյունիքի դեպքերի առնչությամբ։ ԱԺ նիստի ժամանակ նման կարծիք հայտնեց «Իմ քայլի» պատգամավոր Միքայել Զոլյանը` անդրադառնալով դեռ մայիսի 12-ին ադրբեջանցիների` ՀՀ տարածք ներխուժելու դեպքին։
«Բնական է, որ Սյունիքում ստեղծված իրավիճակը և դրա առնչությամբ դիվանագիտական աշխատանքը հանրության շրջանում անհանգստություն է առաջացրել։ Կարծում եմ, որ միանգամայն արդարացի սպասումներ կան ՀԱՊԿ–ից։ Գիտեմ, որ մեծ աշխատանք է կատարվում, որի մեծ մասը չի երևում, սակայն սա այն դեպքն է, որ ճիշտ կլիներ` մեր դաշնակիցները հստակ արտահայտվեին»,–ասաց Զոլյանը։
Նրա խոսքով` ՀՀ դաշնակիցները պետք է հստակ ասեն, որ անընդունելի են ՀՀ–ի հանդեպ գործողությունները, որոնք կասկածի տակ են դնում Հայաստանի տարածքային ամբողջականությունը։
Զոլյանը նշեց, որ սա այն դեպքն է, երբ մենք գործ ունենք ՀԱՊԿ–ի հեղինակության հետ, և սա միայն Հայաստանի խնդիրը չէ, այլ նաև ՀԱՊԿ–ի։
ՀԱՊԿ Հավաքական անվտանգության խորհրդի նախագահը Սյունիքի հետ կապված կարգադրություններ է տվել
Նա հավելեց, որ միայն չերևացող աշխատանքն այս դեպքում չի կարող արդյունավետ լինել` անհրաժեշտ են նաև հստակ հայտարարություններ, որոնք կարտահայտեն ՀԱՊԿ–ի դիրքորոշումը։
Հիշեցնենք, որ մայիսի 14–ին վարչապետի պաշտոնակատար Նիկոլ Փաշինյանը ՀՀ սահմանների առնչությամբ հայտարարել էր` պաշտոնապես դիմել են ՀԱՊԿ–ին, ռազմական աջակցության հարցով դիմել են նաև ՌԴ նախագահ Վլադիմիր Պուտինին։
