Արևելագետ. Թուրքիայում մեծ է արտահերթ ընտրությունների հավանականությունը

ԵՐԵՎԱՆ, հուլիսի 29– Sputnik. Թուրքիայում արտահերթ ընտրությունների անցկացման հավանականությունը շատ մեծ է, չորեքշաբթի լրագրողներին ասաց Հայաստանի Գիտությունների ազգային ակադեմիայի Արևելագիտության ինստիտուտի տնօրեն Ռուբեն Սաֆրաստյանը։

Նրա խոսքով` Թուրքիայում կառավարություն դեռ չի ձևավորվել և, ինչպես կարծում են շատ թուրքական քաղաքական ուժեր, իշխանություններին չի հաջողվի դա անել մինչև օգոստոսի 23–ը, որից հետո մի քանի օրվա ընթացքում Թուրքիայի նախագահը պետք է հայտարարի արտահերթ խորհրդարանական ընտրությունների մասին, որոնք կկայանան այս տարվա նոյեմբերին։

«Թուրքիայում ձևավոևվել է լարվածության և անկայունության մթնոլորտ։ Ընդ որում, այդ իրավիճակը ձեռնտու է իշխող Արդարություն և զարգացում կուսակցությանը` հաշվի առնելով կուսակցության ներկայացուցիչների հայտարարությունը, որոնք ձգտում են արտահերթ խորհրդարանական ընտրությունների, քանի որ ակնկալում են ավելի շատ ձայներ ստանալ, քան նախորդ ընտրություններում. շուրջ 45-46 տոկոս»,– ասաց նա։

Փորձագետի կարծիքով` դա հնարավորություն կտա կոալիցիոնի փոխարեն ձևավորել միակուսակցական կառավարություն ։

Նա նշեց, որ հիմա Էրդողանը և նրա կուսակիցները փորձում են օգտվել լարված արտաքին քաղաքական իրավիճակից, որն ուղղակիորեն ազդում է երկրում ներքին իրավիճակի վրա։

«Ամենից առաջ Էրդողանը ցանկանում է հարվածել քրդամետ քաղաքական ուժերի դիրքերին` թուլացնելով քրդամետ Ժողովրդադեմոկրատական կուսակցությունը։ Նրա հաշվարկներով` արտահերթ ընտրություններում այդ կուսակցությունը չի հաղթահարի 10 տոկոս արգելքը»,– նշեց Սաֆրաստյանը։

Ինչպես կարծում է արևելագետը, դրան նպաստում է Թուրքիայում ուժեղացող հակաքրդական հիստերիան, որը կարող է վարպետորեն օգտագործվել իշխող կուսակցության կողմից` ընտրություններում լրացուցիչ ձայներ ներգրավելու և երկում ազգայնական շարժումներն ակտիվացնելու համար։

Թուրքիայիում հունիսի 7–ին կայացած հերթական խորհրդարանական ընտրությունների արդյունքում իշխող Արդարություն և զարգացում կուսակցությունը ստացել է ընտրողների ձայների 40,8 տոկոսը և 258 տեղ խորհրդարանում։ Սակայն նա կորցրել է խորհրդարանական մեծամասնությունը և չի կարող միայնակ կառավարություն ձևավորել։

Ձախակողմյան Ժողովրդադեմոկրատական կուսակցությունը ստացել է ձայների 25 տոկոսը և 132 տեղ խորհրդարանում, ազգայնական Ազգային շարժում կուսակցությունը` 16,4 տոկոսը և 80 տեղ, քրդամետ Ժողովրդադեմոկրատական կուսակցությունը` 13,1 տոկոս և 80 տեղ։