ԵՐԵՎԱՆ, 4 օգոստոսի –Sputnik. Օգոստոսի 3-ին ՀՀ էկոնոմիկայի նախարարի տեղակալ Սերգեյ Ավետիսյանն ընդունել է ՀՀ-ում գործող ավիաընկերությունների ներկայացուցիչներին և քննարկել են լրացուցիչ հաճախականությամբ ցերեկային չվերթեր իրականացնելու հնարավորությունը:
Ինչպես հայտնում է ՀՀ էկոնոմիկայի նախարարության մամուլի ծառայությունը, հանդիպմանը մասնակցել են «Արմենիա Միջազգային Օդանավակայաններ» ՓԲԸ–ի գլխավոր մենեջերի տեղակալ Անդրանիկ Շխյանը, ՀՀ ԿԱ քաղաքացիական ավիացիայի գլխավոր վարչության և Տնտեսական մրցակցության պաշտպանության պետական հանձնաժողովի ներկայացուցիչներ:
Հանդիպման ընթացքում քննարկվել է ավիաընկերությունների կողմից իրականացվող գիշերային չվերթերի տեղափոխման հնարավորությունը` կարևորելով Հայաստան ժամանող զբոսաշրջիկների համար նպաստավոր պայմանների ապահովման հարցը:
Ավիաընկերությունների ներկայացուցիչները գիշերային չվերթերի իրականացումը հիմնավորել են տարանցիկ երթևեկության համար հարմարավետ միակցումներով` պնդելով, որ ժամերի տեղափոխման դեպքում տարանցիկ ուղևորները ստիպված կլինեն օդանավակայաններում երկար սպասել մյուս չվերթերին` ճամփորդությունը շարունակելու համար:
Արդյունքում, որպես հնարավոր լուծում, ուղևորների հարմարավետ ճամփորդության ապահովման նպատակով քննարկվել է լրացուցիչ հաճախականությամբ ցերեկային չվերթերի իրականացման հնարավորությունը, ինչն ավիաընկերությունների ներկայացուցիչները կքննարկեն գլխամասային գրասենյակների հետ:
Ավիաընկերությունների ներկայացուցիչներն աննպատակահարմար են համարում գիշերային թռիչքներն առավոտյան ժամեր տեղափոխելու նախաձեռնությունը
11:38 04.08.2015 (Թարմացված է: 13:47 04.08.2015)
Բաժանորդագրվել
Ավիաընկերությունների ներկայացուցիչները վստահեցնում են, որ գիշերային ժամերին իրականացվող թռիչքները ցերեկային ժամեր տեղափոխելու դեպքում ուղևորները ստիպված կլինեն օդանավակայաններում երկար սպասել մյուս չվերթերին
