ԵՐԵՎԱՆ, 29 նոյեմբերի — Sputnik. Կուսակցությունների մասին օրենքի նախագծի քննարկումն այսօր ԱԺ-ում դարձյալ շարունակվեց լարված մթնոլորտում: Քաղաքական ուժերի ներկայացուցիչներն առիթն օգտագործեցին միմյանց քննադատելու, երբեմն նույնիսկ փոխադարձ վիրավորանքներ հնչեցնելու համար:
ՀԱԿ խմբակցության ղեկավար Լևոն Զուրաբյանն իշխող Հանրապետական կուսակցությանը մեղադրեց միակուսակցական համակարգ կառուցելու, կեղծ ընդդիմություն ստեղծելու և իրական ընդդիմությանը խոչընդոտելու ու ֆինանսական աղբյուրներից զրկելու համար: Իսկ իրական, ազատ կուսակցական համակարգ ստեղծելու համար ընդդիմության ներկայացուցիչն առաջարկեց կուսակցություններին գոնե 1 մլրդ դրամ պետական ֆինանսավորում տրամադրել:
«Եթե այդ հարցը լուծեք, նշանակում է հիմք եք դնում Հայաստանում անկախ կուսակցական համակարգի համար, բայց քանի որ վստահ եմ, որ ձեր նպատակներն այլ են, ես որևէ հույս չեմ տածում, որ դուք այդ քայլը կանեք»,- ասաց Զուրաբյանը:
ՀՀԿ խմբակցության ղեկավար Վահրամ Բաղդասարյանն էլ ընդդիմադիր գործընկերներին խորհուրդ տվեց թաղային կուսակցություններից վերաճել համապետական կուսակցությունների:
«Կուսակցությունն ընտանեկան բիզնես չէ: Կան ընտանիքներ, որոնք 2-3 կուսակցություն են բացել, թաքուն դրել բարձի տակ»,- ասաց Բաղդասարյանը` հավելելով, որ նման մարդիկ հարմար առիթի են սպասում իրենց կուսակցությունները մեկ պատգամավորական մանդատի դիմաց վաճառքի հանելու համար:
Բաղդասարյանի խոսքով` ընտրությունների ժամանակ պարզվում է, որ կուսակցություններից շատերն անհրաժեշտ քանակի մարդ չունեն ոչ միայն հանձնաժողովի անդամ և վստահված անձ նշանակելու, այլև երբեմն նույնիսկ թեկնածու առաջադրելու համար:
Շուրջ երկու օր տևած քննարկումներից և փոխադարձ քննադատությունից հետո կուսակցությունների մասին օրենքի նախագիծն այսօր դրվեց քվեարկության:
Նախագիծը ներկայացնող արդարադատության նախարար Արփինե Հովհաննիսյանը, ամփոփելով ելույթները, նշեց, որ տարօրինակ չի համարում, որ օրինագծի քննարկումը քաղաքական երանգ ստացավ և քաղաքական ուժերի ներկայացուցիչներն առիթն օգտագործեցին իրար ասելու այն, ինչ վաղուց էր կուտակվել: Այնուհանդերձ նա խնդրեց օրինագծին կողմ քվեարկել` համոզմունք հայտնելով, որ այն միտված է հենց քաղաքական դաշտի կայացմանն ու ժողովրդավարության ամրապնդմանը:
Երկօրյա բուռն քննարկումներից հետո ԱԺ-ն առաջին ընթերցմամբ ընդունեց կառավարության ներկայացրած` կուսակցությունների մասին օրենքի նախագիծը, ինչպես նաև ՄԻՊ և կից օրինագծերի փաթեթը:
