ԵՐԵՎԱՆ, 27 դեկտեմբերի — Sputnik. ՀՀ Ազգային ժողովի նախագահ Գալուստ Սահակյանը Ամանորի առթիվ այսօր տոնական ընդունելության էր հրավիրել խորհրդարանի աշխատանքները լուսաբանած լրատվամիջոցների ներկայացուցիչներին:
«Անցնող տարին հարուստ էր իրադարձություններով, այնպես որ կարծում եմ` ձանձրանալու առիթ չունեցաք: Լրատվամիջոցների ներկայացուցիչները՝ ի դեմս այսօր այստեղ ներկա գտնվողների, Արցախում, թե Հայաստանում տեղի ունեցած բոլոր իրադարձությունների կիզակետում էին` քաղաքացիական ու մասնագիտական պարտքի բարձր գիտակցումով: Մարտադաշտն ու քաղաքական դաշտը, միջպետական ու ներպետական կյանքը երբեք չզգացին անտարբերության կամ անուշադրության որեւէ նշույլ ձեր կողմից»,- իր ելույթում ասաց Գալուստ Սահակյանը:
Ազգային ժողովի նախագահը նշեց նաև, որ թե՛ ինքն անձամբ, և թե՛ Ազգային ժողովի աշխատակազմը մշտապես ձգտել են ԱԺ-ում ապահովել ազատ խոսքի, լրագրողական գործունեության իրականացման անկաշկանդ մթնոլորտ ու պայմաններ, և հույս հայտնեց, որ այդ համագործակցությունը կշարունակվի նաև հաջորդ տարի:
Եվս մեկ անգամ շնորհավորելով Ամանորի և Սուրբ ծննդյան տոների առթիվ` Գալուստ Սահակյանը ներկաներին ու նրանց ընտանիքներին մաղթեց խաղաղություն, բարեկեցություն և ամենայն բարիք:
