ԵՐԵՎԱՆ, 15 հունվարի — Sputnik. ԿԸՀ քարտուղար Արմեն Սմբատյանը խիստ անհրաժշտ է համարում հասարակությանն ու քաղաքական ուժերին ընտրական նոր օրենսգիրքը ներկայացնելը, որպեսզի իրականացվող գործողություններն ընկալելի լինեն: Նախ, նա տեղեկացրեց, որ ցուցակները սկանավորվելու են, քվեարկությունից երկու օր անց դրանք տեղադրվելու են ԿԸՀ կայքէջում:
«Յուրաքանչյուր տեղամասի ցուցակներն առանձին ֆայլով կզետեղվեն ԿԸՀ կայքում, և դա հասանելի կլինի բոլորին»,- ասաց նա:
Ընտրական նոր օրենսգրքով մեխանիզմներ են մշակվել նաև կրկնաքվեարկությունը բացառելու համար: Նոր կարգի համաձայն՝ ընտրողը պետք է գրանցվի, հանձնի մատնահետք, իսկ համապատասխան սարքը պետք է ճանաչի նրա անձը հաստատող փաստաթուղթը: Դրանից հետո ընտրողի համար կտրոն կտպագրվի, ինչը թույլ կտա անցնել քվեարկության փուլ:
«Եթե անձն այդ տեղամասի ընտրող չէ, ապա սարքն ազդակ է հաղորդում այդ մասին՝ դեղին լույս վառելով: Եթե այդ տեղամասի ընտրող է, սակայն արդեն որևէ փաստաթղթով քվեարկել է, կարմիր լույս է վառվում ու ազդանշան հնչեցվում, դրանով կանխվում է կրկնաքվեարկության փորձը»,- պարզաբանեց Սմբատյանը:
Նրա տեղեկացմամբ՝ ԱԺ ընտրության ժամանակ պետք է լինի ոչ թե մեկ քվեաթերթիկ, այլ որքան առաջադրված կլինեն կուսակություններ կամ դաշինքներ. առաջադրված ամեն կուսակցության կամ դաշինքի համար տպագրվելու է առանձին քվեաթերթիկ:
«Ընտրողը պետք է ստանա բոլոր քվեաթերթիկները, մոտենա քվեախցին ու կատարի իր ընտրությունը, որից հետո մնացած քվեաթրթիկները պետք է գցի քվեախցում տեղադրված արկղի մեջ: Եթե ընտրողը ցանկանում է միայն կուսակցությանը կամ դաշինքին ընտրել, ապա քվեաթերթիկը կարող է դնել ծրարի մեջ և մոտենալ քվեատուփի մոտ նստած հանձնաժողովի անդամին»,- ասաց ԿԸՀ քարտուղարը:
Իսկ եթե ընտրողը ցանկանում է նաև տարածքային ցուցակում ընդգրկված թեկնածուներից մեկին ձայն տալ, ապա քվեաթերթիկի հետևի մասում կան այդ տարածքի, տվյալ կուսակցության թեկնածուների անուն-ազգանունները՝ շարվածքով, հերթականությամբ. դրանցից մեկի դիմաց պետք է կատարի v-աձև նշում:
Արմեն Սմբատյանը տեղեկացրեց, որ համապետական ցուցակն ունի երկրորդ մաս, որը նախատեսված է ազգային փոքրամասնությունների համար: Ամենախոշոր 4 ազգային փոքրամասնություններն պետք է տեղեր ունենան ԱԺ-ում:
Համապատասխան պահանջ կա նաև կանանց ներգրավվածության մասին: Օրենքը նախատեսում է, որ համապետական ու տարածքային ցուցակներում միևնույն սեռի ներկայացուցիչների թիվը չի կարող գերազանցել 75 տոկոսը:
