ԵՐԵՎԱՆ, 19 հունվարի — Sputnik. Արաբական Միացյալ Էմիրություններ մեկնող ՀՀ քաղաքացիների համար մուտքի արտոնագրային ռեժիմի վերացման մասին համաձայնագրի նախագիծը կառավարության նիստում կներկայացնի ՀՀ արտգործնախարար էդվարդ Նալբանդյանը։
Կառավարության որոշումից հետո երկու երկրի կառավարությունները պետք է ստորագրեն համաձայնագիր` վիզային ռեժիմը վերացնելու մասին:
ՀՀ ԱԳՆ-ն համարում է, որ փաստաթղթի կնքումը համապատասխանում է Հայաստանի Հանրապետության վարած արտաքին քաղաքականությանը և ստանձնած միջազգային պարտավորություններին:
Պետական փորձագիտական եզրակացության համաձայն` «Հայաստանի Հանրապետության կառավարության և Արաբական Միացյալ Էմիրությունների կառավարության միջև քաղաքացիների մուտքի արտոնագրի պահանջի վերացման մասին համաձայնագրի կնքման առաջարկությանը համաձայնություն տալու մասին» Հայաստանի Հանրապետության կառավարության որոշման նախագիծը համապատասխանում է ՀՀ օրենսդրությանը:
