ԵՐԵՎԱՆ, 18 հունվարի — Sputnik, Լաուրա Սարգսյան. Սաչխերիի լեռնային պատրաստության դպրոցի միջանկյալ դասընթացը, որում ընդգրկված է ՆԱՏՕ-ի անդամ երկրների և գործընկերների 14 զինծառայող Լիտվայից, Ֆրանսիայից, Հայաստանից և Վրաստանից, կավարտվի փետրվարի 10-ին։ Զորավարժությունները կընթանան երկու փուլով։
«Առաջին փուլի ընթացքում զինծառայողները կանցնեն կրակային նախապատրաստություն Օրպոլո զորավարժարանի լեռնային ռելիեֆում։ Երկրորդ փուլի ընթացքում դասընթացի մասնակիցները կմեկնեն Գուդաուրի, որտեղ ձյան վրա կտեղաշարժվեն դահուկներով, ձնահոսքի հետևանքով տուժածների որոնողա-փրկարարական աշխատանքներ և տարհանում կիրականացնեն»,- ասվում է Վրաստանի պաշտպանության նախարարության մամուլի ծառայությունում։
Միջանկյալ ձմեռային դասընթացը վարում են Սաչխերիի լեռնային պատրաստության դպրոցի հրահանգիչները, որի ավարտից հետո զինծառայողները կստանան հավաստագրեր և կրծքանշաններ։
Հայաստանի զինված ուժերը պարբերաբար մասնակցում են Սաչխերիի դպրոցի ամառային և ձմեռային դասընթացներին, որոնց ընթացքում վրացի հրահանգիչների ղեկավարությամբ յուրացնում են տարբեր հմտություններ, ուսումնասիրում եղանակային տարբեր պայմաններում լեռներում տեղաշարժվելու մեթոդները։
Ընդհանուր առմամբ, դասընթացը մշակված է զինվորականների համար` լեռնային պայմաններում և ձյան վրա տեղաշարժվելու տեխնիկան կատարելագործելու նպատակով։
Հայաստանի և Վրաստանի միջև գործում է ամեն տարի նորացվող համաձայնագիր ռազմական ոլորտում երկկողմանի համագործակցության մասին։ Վերջին համաձայնագիրը ստորագրվել է Հայաստանի պաշտպանության նախարար Վիգեն Սարգսյանի և Վրաստանի պաշտպանության նախարար Լևան Իզորիայի միջև Թբիլիսիում 2016թ-ի դեկտեմբերին։
Վրացի նախարարն այդ ժամանակ առաջարկել է հայ զինծառայողներին հատուկ լեռնային պատրաստության դասընթաց անցնել Սաչխերիի դպրոցում։
Միջազգային համագործակցության հիմնական ուղղությունը փորձի փոխանակումն է ռազմավարական պլանավորման, ռազմական կրթության, բժշկության և ռազմական ոստիկանության ոլորտներում։
