ԵՐԵՎԱՆ, 26 հոկտեմբերի — Sputnik, Անի Լիպարիտյան. Նկարչուհի Աննա Հարությունյանի աշխատանքը համալրեց Իսպանիայի բացառիկ թանգարանի մշտական հավաքածուն։
Հայաստանի վաստակավոր նկարչուհի, Երևանի Քրիստափոր Քուշնարյանի անվան արվեստի դպրոցի կերպարվեստի բաժնի վարիչ Աննա Հարությունյանը Sputnik Արմենիային պատմեց իր նախագծի և Իսպանիայում նոր ցուցահանդեսի բացման մասին։
«Իսպանիայի հայ համայնքի` «Արարատ» միության նախագահ Անահիտ Օհանյանը ինձ առաջարկեց ստեղծել կտավ «Հայկական կոշիկ, որը 5500 տարեկան է» թեմայով։ Այդ կաշվե կոշիկը գտել են Արենի գյուղի քարանձավներից մեկում, և այժմ այն պահվում է Երևանի պատմության թանգարանում։ Արդյունքում ես ստեղծեցի երկու մետրից ավելի բարձրության կտավ», — ասաց Աննան։
Նա նշեց, որ նախագիծն արժանացել է Հայաստանի սփյուռքի նախարարության հավանությանը, և որոշում է կայացվել, որ կտավը կներկայացվի Էլդա քաղաքի կոշիկի թանգարանում։
«Դա աշխարհում կոշիկի միակ թանգարանն է, որտեղ բացառիկ ցուցանմուշներ են պահվում, այդ թվում` Հռոմի պապի, Պողոս առաքյալի, հոլիվուդյան աստղերի կոշիկները։ Արդյունքում որոշում ընդունվեց Հայաստանի անունից այդ կտավը նվիրել Իսպանիայի թանգարանին», — ավելացրեց նա։
Հայ նկարչուհու ցուցահանդեսի բացմանը ներկա էին քաղաքի վարչակազմի ներկայացուցիչներ, պատգամավորներ, արվեստագետներ։
«Այցելուները հիմնականում իսպանացիներ էին։ Ցուցահանդեսի ժամանակ հնչում էր Առնո Բաբաջանյանի երաժշտությունը։ Դա շատ հաճելի էր», — ավելացրեց նկարչուհին։
Աննան պատմեց նաև, որ նկարն արվել է կտավի վրա` խառը ոճում և 3D տպավորությամբ։
«Այժմ «Հնության վկան. 5500 տարի» նկարը կախված է լինելու թանգարանի մուտքի մոտ։ Յուրաքանչյուր այցելու առաջին հերթին կտեսնի այն։ Կարծում եմ, որ եթե ինչ-որ մեկը հայրենիքն է ներկայացնում արտերկրում, ապա պետք է այն արժանի ձևով ներկայացնի։ Չէ՞ որ դուք այդ երկրի դեսպանն եք», — ասաց նա։
Բացի այդ աշխատանքից` Աննան ցուցահանդեսին ներկայացրել է ևս մի քանի ստեղծագործություն, որի վաճառքից ստացված գումարը փոխանցվելու է բարեգործական նպատակների համար։
Բացի իր աշխատանքներից` Աննան Միսլաթայի (Վալենսիայի նահանգ) քաղաքապետարանին կից արվեստի երիտասարդական կենտրոն է ներկայացրել իր աշակերտների աշխատանքները։ Ցուցահանդեսը նվիրված էր Հայաստանի անկախության 25-ամյակին։ Աննան նշեց, որ այցելուներին զարմացրել էր հայ երեխաների վարպետությունը։
«Անկախ որոշ դժվարություններից` մենք կարողացան ըստ արժանվույն ներկայանալ ցուցահանդեսին։ Մանկական ցուցահանդեսը տևեց 10 օր։ Ես շատ կցանկանայի, որ նրանք էլ Իսպանիա գային, սակայն սուղ ֆինանսական միջոցների պատճառով դեռ նման հնարավորություն չի ստեղծվել», — ասաց Աննան։
Նա համոզված է, որ Հայաստանի հիմնասյուներից մեկը մշակույթն է։ Հենց դրա համար էլ նա ցանկանում է, որ տաղանդավոր մարդիկ հնարավորություն ունենան ինքնարտահայտվել և արվեստով զբաղվել։
