ԵՐԵՎԱՆ, 11 հունվարի — Sputnik. Մարինա Սարգսյանի ցուցահանդեսը կբացվի «Աուտենտիկա» մշակութաբանական ստուդիայի նախագծի և Կիևի մշակույթի և արվեստների ազգային համալսարանի Գիտական գրադարանի «Ազգի գանձերը» կրթական նախագծի շրջանակներում: Այս մասին հայտնում է AnalitikaUA.net-ը:
Դեկորատիվ-կիրառական արվեստների վարպետ Մարինա Սարգսյանը տարբեր ժանրերով է աշխատում, սակայն նախապատվություն է տալիս Պետրիկովյան նախշազարդերին: Մարինան նշել է, որ մի քանի տարի է պահանջվել «Հայկական խաչքարերը Պետրիկովյան նախշազարդմամբ» աշխատանքների շարքը պատրաստելու համար, որն Ուկրաինայում առաջին անգամ կցուցադրվի:
Նկարչուհու խոսքով՝ Պետրիկովյան նախշազարդն իր համար ուկրաինական հոգին է, որը միաձուլվում է իր ցեղի հայկական արմատներին, իսկ իր աշխատանքներում «խաչքարերը» Հայաստանի գեղարվեստական խորհրդանիշն են ու սիրտը, որն արտացոլում է գեղեցիկի ու հայ ժողովրդի պատմության զգացումը:
Անցյալ տարվա գարնանը Մարինա Սարգսյանի հեղինակային աշխատանքներից մեկը` Զատկի նկարազարդ ձուն, հաղթել էր Կիևի Զատկի ձվի համաուկրաինական փառատոնում։ Նկարչուհու գունազարդած 2.5 մետրանոց 4 ափսեները կտեղադրվեն Եվրատեսիլի ֆան-գոտում։