ԵՐԵՎԱՆ, 12 հունվարի — Sputnik. Sputnik Արմենիայի անցկացրած վիկտորինայի հաղթող է դարձել Երևանի Կոմիտասի անվան պետական կոնսերվատորիայի ուսանողուհի Արսինե Զարգարյանը, որը երկու հարց է ուղղել տաղանդավոր թավջութակահարին։
«Ես տվել եմ ինձ` որպես երաժշտի հետաքրքրող հարցերը ։ Սովորում եմ Կոմիտասի անվան պետական կոնսերվատորիայի երկրորդ կուրսում։ Առաջին հերթին հարցել եմ, թե ինչպես կարող են ազդել երաժշտի վրա հիասթափությունները, կարող են դրանք կոտրել նրան, պատճառ դառնալ ընտրած մասնագիտությունից հրաժարվելու համար», — նշել է Զարգարյանը Sputnik Արմենիա մուլտիմեդիոն մամուլի կենտրոնում Հախնազարյանի հետ հանդիպումից հետո։
Վիկտորինայի մասնակցի երկրորդ հարցը, որ հավանել է թավջութակահարը, հետևյալն է` «Երաժշտի կայացման գործում ի՞նչ դեր են խաղում տաղանդն ու աշխատասիրությունը, ինչպես նաև լավ դասախոսը»։
Ինչպես նշեց Հախնազարյանը, նրան դուր են եկել Facebook սոցիալական ցանցի շատ օգտատերերի հարցեր։ «Շատ հարցեր են եղել սոցցանցի օգտատերերի կողմից, բայց Արսինեի երկու հարցերն ամենից շատ ինձ դուր եկան, ուստի նրան ընտրեցի որպես հաղթող», — ասաց երաժիշտը։
Հախնազարյանի խոսքով` Արսինեի հարցերը շատ արդիական են։ Յուրաքանչյուր երաժշտի կարիերայում լինում են հիասթափություններ, և ինքը բացառություն չէ, բայց թուլության պահերն անցողիկ են։
«Ես շատ անգամ եմ հիասթափվել, բայց միշտ ինքս ինձ ասել եմ` ամենագլխավորը հավատալ սեփական ուժերին և չշեղվել ընտրված ճանապարհից։ Ինձ դուր եկավ նաև այն փաստը, որ Արսինեն ոչ միայն երաժշտության սիրահար է, այլ նաև գործընկեր է, սովորում է մեր հարազատ կոնսերվատորիայում», — ասաց նա։
Հախնազարյանը հավելեց, որ իր ծնողները Երևանի կոնսերվատորիայի պրոֆեսորներ են։
Версия материала на русском языке