20:32 10 դեկտեմբերի 2016
Ուղիղ եթեր
Բրազիլական «Շապեկոենսե» թիմը

Ավիավթարներ կամ ողբերգությունների շարունակություն ֆուտբոլում

NELSON ALMEIDA / AFP
Պատահարներ
Ստանալ կարճ հղումը
9410

Ֆուտբոլային աշխարհում, ցավոք, ավիավթարների շարքն այսօր շարունակություն ունեցավ։ Բրազիլական «Շապեկոենսե» թիմը վթարի ենթարկվեց Կոլումբիայում: Բրազիլացիները ուղևորվում էին Կոլումբիա, որտեղ Հարավամերիկյան գավաթի եզրափակիչ փուլի առաջին հանդիպումն էին անցկացնելու «Աթլետիկոյի» (Նասիոնալ) հետ:

ԵՐԵՎԱՆ, 29 նոյեմբերի – Sputnik, Խաչիկ Չախոյան. Ողբերգությունը տեղի է ունեցել Կոլումբիայի Անտիոքիա նահանգի Լա Ունիոն շրջանում։ Ըստ վերջին տվյալների` օդանավի 72 ուղևորներից փրկվել են 6-ը, որոնց թվում են «Շապեկոենսե» թիմի երեք ֆուտբոլիստները`Ալան Ռուշելը, Ջեքսոն Ֆոլմանը և Մարկոս Դանիլոն:

1949 թվական

Պատմության մեջ ողբերգական նման դեպքեր շատ են եղել: Ֆուտբոլային աշխարհն անդառնալի առաջին կորուստները կրեց 1949 թվականին մայիսի 4-ին, երբ իտալական թիմը Պորտուգալիայից վերադառնալիս վթարի ենթարկվեց Թուրին չհասած: Այն ժամանակ զոհվեց 18 ֆուտբոլիստ, որոնց թվում էին Իտալիայի ազգայինն հավաքականի կորիզը կազմող շատ խաղացողներ`Վալենտինո Մացցոլայի գլխավորությամբ:

1958 թվական

Հաջորդ անմոռանալի կորուստը ֆուտբոլային աշխարհը կրեց 1958 թվականին: Այդ տարվա փետրվարի 6-ին Մյունխենի օդանավակայանից թռիչքի ժամանակ վթարի ենթարկված ինքնաթիռի ուղևորների մեջ էին «Մանչեսթեր Յունայթեդի» ֆուտբոլիստները: Վթարի պատճառով զոհվեց 24 մարդ, որոնց թվում էին նաև մանկունյանցիների ութ ֆուտբոլիստները:

Հրաշքով փրկվեցին թիմի գլխավոր մարզիչ Մեթ Բասբին և «Յունայթեդի»` այժմ արդեն լեգենդար ֆուտբոլիստ Բոբի Չառլթոնը: Իսկ կարմիր սատանաների և Հյուսիսային Իռլանդիայի ազգային հավաքականի դարպասապահ Հարրի Գրեգը, չնայած ստացած վնասվածքներին, կես տարի անց արդեն պաշտպանում էր «Մանչեսթեր Յունայթեդի» դարպասը:

1960 թվական

1960 թվականի Հռոմի օլիմպիական խաղերից առաջ ավիավթարը Դանիայի օլիմպիական հավաքականի ութ ֆուտբոլիստի կյանք խլեց: Չնայած ողբերգությանը` Դանիայի հավաքականը որոշեց մասնակցել օլիմպիական խաղերին` այդպիսով հարգանքի տուրք մատուցելով վթարի զոհ դարձած ֆուտբոլիստների հիշատակին:

1979 թվական

Ֆուտբոլային ամենացավոտ ավիավթարներից մեկը գրանցվել է 1979 թվականին: Նախկին ԽՍՀՄ առաջնության մասնակից Տաշքենդի «Պախտակորի» 17 ֆուտբոլիստներ զոհվեցին օգոստոսի 11-ին գրանցված ավիավթարի ժամանակ: 8400 մետր բարձրության վրա բախվեցին Տու-134 երկու ինքնաթիռները, ինչի պատճառով զոհվեց 178 մարդ: Իրենց մահկանացուն կնքեցին հայտնի ֆուտբոլիստներ Միխայիլ Անն ու Վլադիմիր Ֆյոդորովը: Միայն երջանիկ պատահականության շնորհիվ ողջ մնաց թիմի գլխավոր մարզիչ Օլեգ Բազիլևիչը, որը մեկ օրով մեկնել էր ընտանիքին տեսակցելու:

1989 թվական

Հիշարժան է նաև 1989 թվականի հունիսի 7-ի ավիավթարը, որը հոլանդացի 23 ֆուտբոլիստի մահվան պատճառ դարձավ: Այստեղ նույնպես միայն պատահականության շնորհիվ այդ ինքնաթիռում չհայտնվեցին Ռուդ Գուլիտն ու Ֆրենկ Ռեյկարդը, որոնք Հոլանդիայի հավաքականի և եվրոպական ֆուտբոլի առաջատար ֆուտբոլիստներից էին:

1993 թվական

1993 թվականին էլ աշխարհի առաջնության ընտրական փուլի հանդիպմանը մեկնելիս զոհվեցին Զամբիայի հավաքականի 18 ֆուտբոլիստները: Սենեգալի հետ հանդիպումը չկայացավ, ինքնաթիռը, Գաբոն չհասած, ընկավ ծովը:

Գլխավոր թեմաներ