ԵՐԵՎԱՆ, 19 հունվարի — Sputnik. Շավարշ Քոչարյանը տեղեկացրեց, որ հետաքննական մեխանիզմների հարցը լուծվում է ԵԱՀԿ շրջանակում, և դրանց համար պետք են համապատասխան գումարներ, բյուջե և համաձայնեցում։
«Այստեղ Ադրբեջանը խոչընդոտում է։ Ստիպված եմ հիշեցնել, որ խնդիրը նոր չի ծագել։ Իհարկե, Վիեննայում դա ամրագրվել է որպես պարտավորություն։ Բայց դեռևս 1995 թվականին Ղարաբաղի, Ադրբեջանի և Հայաստանի միջև ստորագրված եռակողմ համաձայնագրով ամրագրված է այդ մեխանիզմը։ Սա նույնպես Ադրբեջանի միջազգային պարտավորությունն է»,- ասաց Քոչարյանը։
Նա շեշտեց, որ հետաքննական մեխանիզմների ներդրման հարցին պարբերաբար արձագանք է եղել։
«Ադրբեջանն արգելափակել է ԵԱՀԿ բյուջեն և թույլ չի տվել, որ այդ ուղղությամբ քայլեր կատարվեն«,-ասաց նա։
Շավարշ Քոչարյանն ասաց, որ հիմա էլ Ադրբեջանը չի փոխում իր որդեգրած քաղաքականությունը։
Նրա խոսքով` հետաքննական մեխանիզմը սովորաբար կիրառվում է կոնկրետ դեպքի կապակցությամբ և, որ ամենակարևորն է, շատ արագ։
