ԵՐԵՎԱՆ, 19 հունվարի-Sputnik. Կառավարությունը հավանություն տվեց «2000 թվականի սեպտեմբերի 25-ի՝ Հայաստանի Հանրապետության կառավարության և Ռուսաստանի Դաշնության կառավարության միջև Հայաստանի Հանրապետության քաղաքացիների և Ռուսաստանի Դաշնության քաղաքացիների` առանց արտոնագրերի այցելությունների մասին համաձայնագրում հայտագրերի փոխանակման ձևով փոփոխություններ կատարելու մասին» համաձայնագրին։
Դա նշանակում է, որ ՌԴ քաղաքացիները Հայաստանի տարածք մտնել, դուրս գալ ու տեղաշարժվել կարող են ներքին անձնագրերով։
«Փոփոխությունը ոչ միայն կդյուրացնի ՌԴ քաղաքացիների` ՀՀ տարածք այցելությունների ռեժիմն, այլև կխթանի զբոսաշրջությանը, ինչպես նաև երկու պետությունների միջև տնտեսական, առևտրային, գիտատեխնիկական, մշակութային և այլ ոլորտներում հարաբերությունների զարգացմանը»,-հիմնավորման մեջ ներկայացրեց փոխարտգործնախարար Շավարշ Քոչարյանը։
