ԵՐԵՎԱՆ, 25 դեկտեմբերի — Sputnik. Ռուսաստանի ժողովրդական արտիստ, Ալեքսանդրովի անվան համույթի առաջատար մենակատար Վադիմ Անանևը պատմել է, որ չի թռչել Լաթաքիա Ռուսաստանի ՊՆ Տու-154 ինքնաթիռով, որովհետև թույլտվություն է խնդրել, հաղորդում է «Զվեզդա» հեռուստաալիքը:
Նա պատմել է, որ նախօրեին ծնվել է նրա երրորդ երեխան, և նա որոշել է օգնել կնոջը, որն իրեն վատ է զգացել: Համերգը մեծ չի եղել, և չի պահանջվել ամբողջ խմբի ներկայությունը, այդ պատճառով նա թույլտվություն է խնդրել և մնացել տանը:
«Այնտեղ մեկնեցին իմ գործընկերները և ընկերները՝ 50-հոգանոց երգչախումբը: Նրանք պետք է համերգ տային և վերադառնային: Առայժմ չգիտեմ՝ ինչ ասեմ: Ես չմեկնեցի անձնական պատճառներով. բոլորովին վերջերս ծնվել էր տղաս՝ ընտանիքում երրորդ երեխան, ուստի ես մնացի տանը, որ օգնեմ կնոջս»,- ասել է նա:
Կործանված Տու-154-ում է գտնվել Ռուսաստանի գլխավոր ռազմական դիրիժոր, գեներալ-լեյտենանտ Վալերի Խալիլովը։
Ալեքսանդրովի անվան համույթը կազմված է 186 արտիստից՝ տղամարդկանց երգչախումբ, նվագախումբ և պարային խումբ: Համույթի երգչախումբը մի քանի անգամ ճանաչվել է աշխարհի լավագույն երգչախմբերից մեկը: Հիմա այն Ռուսաստանի ամենամեծ ռազմական գեղարվեստական կոլեկտիվն է։
Համույթը հիմնվել է Մոսկվայի կոնսերվատորիայի պրոֆեսոր, ԽՍՀՄ ժողովրդական արտիստ, կոմպոզիտոր Ալեքսանդր Ալեքսանդրովի կողմից: Կոլեկտիվի առաջին ելույթը տեղի է ունեցել 1928թ-ին:
Նյութի ռուսերեն տարբերակը
