Իրատես. Հեռուստաընկերություններում նախընտրական գրաքննություն և վերադասավորումներ են
«Իրատես» թերթը գրում է, որ հեռուստաընկերությունների համար նախընտրական գրաքննությունը սկսված է։ Որոշ ԶԼՄ-ներում վերադասավորումներ են, և հիմնական թիրախ են դարձել քաղաքական ձևաչափով հաղորդումները։
«Ասում են նաև, թե որոշ հաղորդաշարեր հնարավոր է հանվեն, մյուսները՝ փոփոխությունների ենթարկվեն։ Առաջիկայում գործունեության ուղղվածության փոփոխություններ կլինեն նաև իշխանության հովանավորությունը վայելող ԶԼՄ-ներում»,- գրում է թերթը:
Ժողովուրդ. Ո՞ր պատգամավորների աշխատավարձերից են 14 մլն դրամի պահումներ արվել
«Ժողովուրդ» թերթը գրում է, որ ՀՀ Ազգային ժողովում՝ «երկրի ամենաքաղաքականացված մարմնում», աշխատանքը գնահատվում է քվեարկություններով. եթե պատգամավորը բացակայում է քվեարկություններից, ենթարկվում է պատասխանատվության:
««Ժողովուրդը» տեղեկացավ, որ ԲՀԿ ներքին խմորումների հետևանքով քաղաքական արենայից տևական ժամանակ անհետացած Աբրահամ Մանուկյանը տուգանվել է մոտ 120 հազար դրամով: Հարգելի չեն համարվել նաև ՀՀ ոստիկանապետ Վլադիմիր Գասպարյանի փեսայի՝ ԱԺ պատգամավոր Արթուր Գևորգյանի բացակայությունները: Ամիսներ շարունակ ԱՄՆ-ում բնակվելու համար Արթուր Գևորգյանի մի քանի ամսվա աշխատավարձից մոտ 1 միլիոն 200 հազար դրամի չափով պահումներ են արվել:
Ինչի՞ վրա են ծախսվում օրենսդիրներից արված պահումները: «Ժողովուրդի» այս հարցին ԱԺ աշխատակազմի ղեկավար Հրայր Թովմասյանը պատասխանեց. «Պահվել է 14 միլիոն դրամ, որը մնում է աշխատավարձի ֆոնդում»: Իսկ պատգամավորներ կան, որոնք ԱԺ-ից պահանջում են հավելավճար՝ արտահերթ կարգով աշխատելու համար»,- գրում է թերթը:
Հրապարակ. Ո՞վ կփոխարինի Գևորգ Ալթունյանին
«Հրապարակ» թերթը գրում է, որ օրերս աշխատանքից ազատվել է Հանրային հեռուստաընկերության Առաջին լրատվականի տնօրեն Գևորգ Ալթունյանը: Անցած կիրակի նա իր վերջին «Կիրակնօրյա լրատվականն» է վարել։
«Բաղրամյան 26-ի «Հրապարակի» աղբյուրը նրա պաշտոնանկումը վերագրում է Ալեքսան Հարությունյանի ամբիցիաներին, որը փորձում է վերականգնել իր թիմը Հ1-ում, և գործընթացն սկսել է լրատվականից: Թե ով կփոխարինի Ալթունյանին, մի քանի անուններ են շրջանառվում: Թեկնածուների թվում է Հանրայինի լրատվականի ծառայության նախկին տնօրեն Հարություն Հարությունյանը, որը ժամանակին մտերիմ էր Ալեքսան Հարությունյանի հետ։ Նա ՀՌԱՀ անդամ է, նաև դաշնակցական: Շրջանառվում են նաև Հ1-ի դպրոցն անցած, այսօր «Արմենիա» հ/ը լրատվական բաժնի ղեկավար Արտակ Ալեքսանյանի և հաղորդավար Արտակ Հերիքյանի անունները: Հանրայինում չեն բացառվում այլ պաշտոնանկություններ ևս»,- գրում է թերթը:
Հրապարակ. Հարսի ծնունդը Դուբայում` տնով–տեղով, խնամիներով
«Հրապարակ» թերթը գրում է, որ իր տեղեկություններով՝ նախորդ շաբաթ Հովիկ Աբրահամյանն ու Գագիկ Ծառուկյանը մեկնել են Դուբայ՝ նշելու Ծառուկյանի դստեր, Արգամիչի հարսի՝ Էմմայի ծնունդը:
«Նոյեմբերի 1-ին Արտաշատի քաղաքապետ Արգամ Աբրահամյանի կինը՝ Էմմա Ծառուկյանը, դարձավ 27 տարեկան, և, ահա, խնամիները որոշել են այն նշել տաք երկրում՝ օտար աչքերից հեռու: Մեկնել են ընտանիքներով՝ զավակների և թոռների հետ միասին»,- գրել է թերթը:Գոլոս
Արմենիի. Կհասնե՞նք միլիոնի
Թերթը գրում է, որ Հայաստան այցելած զբոսաշրջիկների թիվն աճել է 3,6 տոկոսով։ Ազգային վիճակագրական ծառայության տվյալներով` այս տարվա հունվարից մինչև սեպտեմբեր երկիր է այցելել 969010 մարդ։ 2015թ. նույն ժամանակաշրջանի համեմատ այդ ցուցանիշն աճել է 3,6 տոկոսով։ Այս տարվա հունվարից սեպտեմբեր զբոսաշրջային նպատակով Հայաստան այցելել է 903541 մարդ, և այդ ցուցանիշը նախորդ տարվա համեմատ աճել է 3 տոկոսով։
«2017 թվականին Հայաստանում տուրիզմի ոլորտին պետական աջակցությունը նվազել է. պետբյուջեից կհատկացվի 100 միլիոն դրամ` այս տարվա 188,4-ի փոխարեն։ Իրականացվելիք ծրագրերի թվում են ներքին տուրիզմի խթանումը, ավանդական փառատոների անցկացումը, միջազգային համագործակցության զարգացումը, ինչպես նաև ճանաչողական այցերն արտասահմանյան ԶԼՄ-ների ներկայացուցիչների համար։
