20:33 10 դեկտեմբերի 2016
Ուղիղ եթեր
Եվգենի Պլյուշչենկո

Նորաձևություն, երաժշտություն և պար... երևանցիները հրճվանքի մեջ են

© Sputnik/ Asatur Yesayants
Հասարակություն
Ստանալ կարճ հղումը
Անի Լիպարիտյան
2230

KINGS ON ICE PRESENT FASHION ON ICE երևանյան շոուին շատերն էին սպասում անհամբերությամբ։ Նախորդ տարվա «Սառույցի արքաները» շոուի համեմատ, այս տարվա միջոցառումն իսկապես մեծ աղմուկ էր բարձրացրել։

Երեկվա երեկոն թեժ էր Երևանում, ավելի ճիշտ` Կարեն Դեմիրճյանի անվան մարզահամերգային համալիրում։

Անտեսելով ցուրտը` մարդիկ հերթ էին կանգնել դրսում, որպեսզի կարողանան ներկա լինել գեղասահքի արքա Եվգենի Պլյուշչենկոյի բացառիկ շոուին։ Շատ արագ մոռացվեցին բոլոր այն տհաճ պահերը, երբ կազմակերպիչները բջջային սարքերի հատուկ հավելվածով ստուգում էին տոմսերը, իսկ դռների հետևում մնացած մարդիկ էլ դժգոհում էին անվերջանալի թվացող հերթից ու կուտակումներից. շոուն իսկապես հիասքանչ էր։

Երբ երաժշտությունը ջերմացնում է սառույցը

Հայտնի գեղասահորդներ Ադելինա Սոտնիկովան, Եկատերինա Աստախովան և Ալեքսեյ Ռոգոնովը, Անաստասիա Գալուստյանը, Ամոդիո Ֆլորան, Սլավա Հայրապետյանը և մի շարք այլ վարպետներ դուրս եկան սահադաշտ և հանդիսատեսի բուռն ծափերի արժանացան։ Սառցե բեմ դուրս եկան նաև բրենդային հագուստներ ցուցադրող հայ մոդելները։

Միջոցառման ընթացքում ելույթ ունեցան նաև հայտնի երգիչներ Մարիամ Մերաբովան, Իվետա Մուկուչյանը, Քսենոնան, Սոնան, Ալյոնա Վասիլևան։ Հանդիսատեսի հիացմունքին արժանացան վիրտուոզ ջութակահարներ Էդվին Մարտոնն ու Էդգար Հակոբյանը։

Հատկապես տպավորիչ էր Պլյուշչենկոյի «տիեզերական» ելույթը, ֆրանսիացի «ջիգիթներ» Ալեքսեյ Լյուբչենկոյի և Ժան-Դենի Սանչեսի, ինչպես նաև կովբոյ-աղջիկներ Տատյանա Ռոզանովայի և Քսենիա Կորոբկովայի շլացուցիչ պարերը։

Հայ հանդիսատեսին ռոմանտիկ կատարումներով զարմացրեց Ելենա Յովանովիչ-Նոդարի Մայսուրաձեն, որն իր համարը կատարեց Ալեխանդրո Սաֆինայի «Luna Tu» լեգենդար երգի հնչյունների ներքո, ինչպես նաև` Եկատերինա Աստախովան և Ալեքսեյ Ռոգոնովը, որոնք ելույթ ունեցան «Я тебя никогда не забуду» երգի ուղեկցությամբ։

«Երկրաշարժ»

Ռուսաստանի տասնակի չեմպիոն, Եվրոպայի յոթնակի չեմպիոն, աշխարհի եռակի չեմպիոն, օլիմպիական խաղերի կրկնակի արծաթե մեդալակիր և օլիմպիական կրկնակի չեմպիոն Եվգենի Պլյուշչենկոն հիացրեց հանդիսատեսին, երբ ելույթ ունեցավ «Երկրաշարժ» ֆիլմի սաունդթրեքի ներքո։

Երաժշտության հեղինակներն են Հայկոն և Էդգար Հակոբյանը։ Պլյուշչենկոյի վարպետությունը, նրա ճկունությունն ու զգացմունքները չէին կարող անտարբեր թողնել հանդիսատեսին։ Գեղասահորդի ելույթի ժամանակ Մարզահամերգային համալիրի մեծ էկրաններին կադրեր էին ցուցադրում «Երկրաշարժ» ֆիլմից։

Տխուր երաժշտությունը, 1988 թվականի Սպիտակի երկրաշարժի կադրերն ու Պլյուշչենկոյի հուզիչ կատարումը հանդիսատեսին ստիպեցին արտասվել։

Պլյուշչենկոն սև կոստյումով էր… Ելույթի վերջում բեմ դուրս եկավ սպիտակ հագուստով աղջնակը։ Եվգենին գրկեց նրան, օդ բարձրացրեց ու ասաց. «Ես այս համարով ուզում էի ասել, որ կյանքը շարունակվում է»։ Հանդիսատեսի բուռն ծափահարություններն էլ նա ուղղեց բոլոր նրանց, ովքեր տուժել են ավերիչ երկրաշարժից։

Գլխավոր թեմաներ