ԵՐԵՎԱՆ, 30 նոյեմբերի — Sputnik. Հայտնի դերասան Թոմ Հենքսը տեսանյութ է հրապարակել, որում կոչ է անում մասնակցել «Հայաստանի մանուկներ» հիմնադրամի կազմակերպած բարեգործական ընթրիքին։
«Հրավիրում եմ ձեզ մասնակցել «Հայաստանի մանուկներ» հիմնադրամի գալա ընթրիքին, որը տեղի կունենա դեկտեմբերի 9-ին։ Ես անձամբ չեմ կարող մասնակցել այդ միջոցառմանը, դրա համար ինձ անհարմար եմ զգում»,- ասել է Հենքսը։
Նա նշել է, որ իր լավ ընկերը` Անդրեա Մարտինը, կրում է իր մեջ Հայաստանի ոգին և կազմակերպել է այդ «հիասքանչ գալա ընթրիքը»:
«Խնդրում եմ միացե՛ք, խնդրում եմ օգնե՛ք, ուսումնասիրե՛ք ձեր հայկական արմատները, նույնիսկ եթե հայ չեք, հոգ չէ, պարզապես վայելեք հիասքանչ երեկոն: Աստված Ձեզ հետ և շնորհակալություն»,- գրել է հայտնի դերասանը։
Հիշեցնենք, որ Թոմ Հենքսը հոլիվուդյան դերասանուհի Մեգ Ռայանի հետ նկարահանվել է «Իթաքա» ֆիլմում, որը նկարահանվել է աշխարհահռչակ գրող Վիլյամ Սարոյանի «Մարդկային կատակերգություն» վեպի մոտիվներով։
