ԵՐԵՎԱՆ, 27 դեկտեմբերի — Sputnik. 2016 թվականի ընթացքում Հայաստան է տեղափոխվել 516 սիրիահայ։ Այս մասին ամփոփիչ մամուլի ասուլիսի ժամանակ լրագրողներին ասաց սփյուռքի նախարար Հրանուշ Հակոբյանը։
«Այս տարի 18 հազար սիրիահայ ՀՀ քաղաքացիություն է ստացել, 1800-ը՝ կացության իրավունք, 300-ը՝ փախստականի կարգավիճակ»,- ասաց նախարարը։
Հրանուշ Հակոբյանը նշեց, որ հիմա Հայաստանում ապրում է 22 հազար սիրիահայ։ «Իհարկե, անցնող տարին ծանր էր։ Բայց պետք է ասեմ, որ տարեսկզբից Հայաստանից Արեւմուտք սիրիահայերի տեղափոխության ցուցանիշները նվազել են, նրանք ավելի շատ սկսել են մնալ պատմական հայրենիքում»,- հավելեց նախարարը։ Ըստ Հակոբյանի`առաջացած փաստաթղթային խնդիրներն այժմ լուծվում են հեշտությամբ եւ պարզեցված ձևով. «Սիրիահայը հայրենիքում փախստական չի կարող կոչվել»,-ընդգծեց նախարարը:
Անդրադառնալով ապրիլյան դեպքերին`Հրանուշ Հակոբյանը հպարտությամբ նշեց, որ այդ օրերին սփյուռքը համախմբվեց, ժողովուրդը մեկ օրում ազգ դարձավ: «Մենք տեսանք այն հզոր ուժը, ոգին, տեսանք, որ ամբողջ սփյուռքը կանգնեց Արցախի, հայության կողքին: Շատ կարեւոր էր այն նյութական եւ բարոյական օգնությունը, որ նրանք ցուցաբերեցին Արցախին։ 2017-ը ուզում ենք հայտարարել Արցախի տարի։ Ազգովի պետք է հասկանանք, որ Արցախի հզորությունը Արցախի պաշտպանության, տնտեսության հզորացումն է»,-ասաց նախարարը:
Հրանուշ Հակոբյանն ասաց, որ իրենց նախարարությունը կառավարությունում առանձնանում է. «Մենք չենք կարող հրամայել, հանձնարարել, վերահսկել եւ պահանջել: Սփյուռքի նախարարությունը պետք է բանակցի, խնդրի, համոզի, սպասի, երկխոսի: Կուզեն՝ կանեն, չեն ուզի՝ չեն անի, որովհետեւ նրանք մեր աշխատակիցները չեն, մեր ենթակաները չեն: Մենք ունենք 30 հազար հայկական կազմակերպություն, 38 համահայկական կազմակերպություն, ունենք 1004 դպրոց, միայն այս տարի 26-ով ավելացել է մեր մեկօրյա դպրոցների թիվը, ունենք 821 համայնք, որի հետ մենք աշխատում ենք»:
Հետո նախարարը ուրախությամբ ասաց, որ վերջերս 2 երկրում էլ հայ են հայտնաբերել։ Դրանք են Կոստա Ռիկան եւ Նիկարագուան: Կոստա Ռիկայում 400 հայ կա, Նիկարագուայում՝ 380 հայ: «Սա խոսում է այն մասին, որ չկա աշխարհում մի երկիր, որտեղ հայ չկա»,-իր ուրախությունն ու զարմանքն է լրագրողների հետ կիսում Հրանուշ Հակոբյանը:
Նյութի ռուսերեն տարբերակը
