ԵՐԵՎԱՆ, 9 հունվարի — Sputnik. ՀՀ կրթության և գիտության նախարարությունը դպրոցներում դասերը հետաձգելու մտադրություն չունի: Այս մասին Sputnik Արմենիային հայտնեց ԿԳՆ Հանրակրթության վարչության պետ Նարինե Հովհաննիսյանը: Մեր զրուցակիցը նաև հայտնեց, որ այսօր, թեև բացակայությունները դպրոցներում մեծ թիվ են կազմել, բայց դպրոցների տնօրենները ծնողներին հորդորում են երեխաներին դասերից հետ չպահել:
«Ամենացուրտն այսօր Երևանում և Արարատյան դաշտում է, մնացած մարզերում եղանակի հետ կապված խնդիր չկա, բայց դպրոցներում ամեն ինչ անում են անհրաժեշտ ջերմություն ապահովելու համար»,- ասաց Նարինե Հովհաննիսյանը:
Ինչ վերաբերում է այսօրվա հաճախումներին, Հանրակրթության վարչության պետը հայտնեց, որ նախարարությունը կապ է հաստատել դպրոցների հետ՝ իրավիճակը պարզելու համար:
«Բացակայությունները հիմնականում գրանցվել են ավելի կրտսեր տարիքի երեխաների շրջանում: Բարձր դասարանի աշակերտները հիմնականում դպրոց են եկել՝ արձակուրդից հետո իրենց դասընկերներին հանդիպելու համար»,- ասաց նա:
Նարինե Հովհաննիսյանի խոսքով` Առողջապահության նախարարությունը նույնպես դասերը հետաձգելու առաջարկով ԿԳՆ չի դիմել, ինչը նշանակում է, որ անկախ եղանակի կանխատեսումներից` Երևանում ու Արարատյան դաշտում դպրոցներում դասերը հետաձգելու որոշում չի կայացվի:
Նշենք, որ Արտակարգ իրավիճակների նախարարության հրապարակած տեղեկատվության համաձայն` Արարատյան դաշտում և մայրաքաղաքում ցուրտ եղանակը կպահպանվի առնվազն մինչև այս շաբաթվա ավարտը:
