ԵՐԵՎԱՆ, 27 նոյեմբերի — Sputnik. Լեգենդար ռուս գեղասահորդ, օլիմպիական կրկնակի չեմպիոն Եվգենի Պլյուշչենկոն Երևանում տեղի ունեցած սառցե շոուի ժամանակ իր համարը ներկայացրեց «Երկրաշարժ» ֆիլմի համար կոմպոզիտոր Հայկոյի գրած երաժշտության ներքո:
Գեղասահորդը չափազանց հուզիչ կատարեց համարը:
Ելույթի վերջում Պլյուշչենկոյին միացավ մի փոքրիկ գեղասահորդ աղջնակ, որին նա գրկեց, բարձրացրեց վեր և ասաց, որ «այս համարով ցանկանում էր ցույց տալ, որ կյանք կա»: Գեղասահորդը խոստովանեց, որ համարը շատ ջերմ է և խորը, ինքն այն կատարեց ամբողջ հոգով:
«Մենք բոլորին հիշում ենք, և ձեր ծափահարություններն ուղղված են այն մարդկանց, ովքեր տուժել են: Այս համարում ես փորձեցի ցույց տալ, որ կյանքը շարունակվում է, մենք մեծանում ենք, առաջ շարժվում, ընտանիքներ են կազմվում… Մենք ապրում ենք հանուն երեխաների, հանուն ապագայի, այդ իսկ պատճառով մաղթում եմ բոլորիս խաղաղություն, սեր և հանգստություն: Մենք անպայման կգանք ձեզ մոտ, մենք նոր ենք սկսել բարեկամանալ և սիրահարվել ձեզ», — ասաց նա:
Սարիկ Անդրեասյանի «Երկրաշարժ» ֆիլմի պրեմիերան Երևանում տեղի ունեցավ նոյեմբերի 10-ին։ Այն նվիրված է 1988 թվականի դեկտեմբերի 7-ին Հայաստանում տեղի ունեցած երկրաշարժին, որի հետևանքով ավերվեցին Սպիտակ, Լենինական, Կիրովական և Ստեփանավան քաղաքները։ 25 հազար մարդ մահացավ, 19 հազարը մնաց հաշմանդամ, իսկ ավելի քան կես միլիոն մարդ դարձավ անօթևան։
