ԵՐԵՎԱՆ, 26 դեկտեմբերի — Sputnik. Ֆրանսիայի ամենահայտնի անձանց 50 վարկանիշային աղյուսակի 21-րդ տեղը զբաղեցրել է հանրահայտ Շառլ Ազնավուրը։ Ցանկը կազմել է ֆրանսիական Le Journal du Dimanche շաբաթաթերթը: Այս մասին հայտնում է Europe 1-ը։
Ֆրանսիայի ամենահայտնի մարդկանց ցանկի առաջին հորիզոնականում դերասան Օմար Սին է, որը հայ հանդիսատեսին հայտնի է առավելապես «1+1» ֆիլմում խաղացած դերով։
Առաջին տասնյակում հիմնականում դերասաններ են՝ Դենի Բուն (5-րդ տեղ), Սոֆի Մարսոն (8 տեղ) և Ժան Ռենոն (9 տեղ)։
Վարկանիշային աղյուսակում ընդամենը 11 կնոջ անուն կա, որոնցից մեկն էլ քաղաքական գործիչ Մարի լը Պենն է (37 տեղ)։
Շառլ Ազնավուրը (իսկական անունն է Շահնուր Վաղինակ Ազնավուրյան (Shahnour Varenagh Aznavurjian)) ծնվել է 1924թ. մայիսի 22-ին Փարիզում, հայ գաղթյալների ընտանիքում։
Ազնավուրը ստեղծել է մոտ 1000 երգ, նկարահանվել 60 ֆիլմում և վաճառել ավելի քան 100 մլն ձայնասկավառակ։ TIME և CNN հանդեսի համատեղ հարցման համաձայն՝ Ազնավուրը XX դարի լավագույն էստրադային կատարող է ճանաչվել։
Ազնավուրը համագործակցել է Էդիտ Պիաֆի, Ֆրենկ Սինատրայի Ռեյ Չարլզի, Լայզա Մինելիի, Բոբ Դիլանի, Խուլիո Իգլեսիասի, Լուչիանո Պավարոտիի և համաշխարհային ճանաչում ունեցող մի շարք այլ անձանց հետ
2008 թվականին Հայաստանի նախագահ Սերժ Սարգսյանը հրաման է ստորագրել Ազնավուրին ՀՀ քաղաքացիություն շնորհելու մասին։
1995թ.-ից Ազնավուրը Հայաստանի դեսպանն է ՅՈՒՆԵՍԿՕ-ում, իսկ 2009թ. մայիսի 6-ին նա նշանակվել է Շվեյցարիայում Հայաստանի արտակարգ և լիազոր դեսպան, ինչպես նաև ՄԱԿ-ում և միջազգային այլ կազմակերպություններում Հայաստանի մշտական ներկայացուցիչ:
Նյութի ռուսերեն տարբերակը
