ԵՐԵՎԱՆ, 16 հուլիսի–Sputnik. Հուլիսի 19–ին Ռուսական արվեստի թանգարանում տեղի կունենա «Մինաս և Նարեկ Ավետիասյան. Մոդեռնը և ավանգարդը Հայաստանում» եռալեզու պատկերագրքի շնորհանդեսը, որի ժամանակ արվեստասեր հասարակությանը կներկայացվի Մինաս Ավետիսյանի «Մենք այստեղ ապրել ենք: Ջաջուռ» կտավը, հաղորդում է ՀՀ մշակույթի նախարարության մամուլի ծառայությունը։
Ըստ հաղորդագրության` շնորհանդեսի ժամանակ այցելուներին հնարավորություն կընձեռնվի հանդիպել Մինաս Ավետիսյանի կրտսեր որդու՝ Նարեկ Ավետիսյանի հետ։
2015 թվականի հուլիսի 20-ին լրանում է հայ մեծանուն նկարիչ Մինաս Ավետիսյանի ծննդյան 86-ամյակը:
«Մշակույթների երկխոսություն» հիմնադրամը, համագործակցելով Գերմանիայի Սաքսոնիա-Անհալթ երկրամասի Մորիցբուրգ թանգարանի հետ, նկարչի 85-ամյա հոբելյանի շրջանակներում 2014 թվականի փետրվարի 21-ին ներկայացրել էր «Մինաս և Նարեկ Ավետիսյան. մոդեռնը և ավանգարդը Հայաստանում» խորագիրը կրող ինքնատիպ ցուցահանդեսը:
«Ցուցահանդեսի շրջանակներում «Մշակույթների երկխոսություն» հիմնադրամի ջանքերով և Մորիցբուրգ թանգարանի աջակցությամբ հրատարակվեց եռալեզու (գերմաներեն, հայերեն, անգլերեն) պատկերագիրք, ուր տեղ են գտել Մինասի կյանքն ու ստեղծագործական ուղին լուսաբանող տարբեր նյութեր և բացառիկ լուսանկարներ», – նշվում է հաղորդագրության մեջ։
Պատկերագրքում ընդգրկված է նաև նկարչին նվիրված էսսե, որտեղ արվեստի պատմության գերմանացի պրոֆեսոր, պատվավոր դոկտոր Վիլհեմ Շլինկը բարձր է գնահատում Մինասի արվեստը՝ այն դիտարկելով միջմշակութային համատեքստում:
Երևանում տեղի կունենա «Մինաս և Նարեկ Ավետիասյան. Մոդեռնը և ավանգարդը Հայաստանում» պատկերագրքի շնորհանդեսը
13:42 16.07.2015 (Թարմացված է: 14:52 16.07.2015)
Բաժանորդագրվեք
Պատկերագիրքը հրատարակվել է «Մշակույթների երկխոսություն» հիմնադրամի ջանքերով և Գերմանիայի Սաքսոնիա-Անհալթ երկրամասի Մորիցբուրգ թանգարանի աջակցությամբ
